Footer

SALAYSAY: Taldiap ken ni Bagyo Pepeng: Makalawas a kinadamsak (Maudi a paset)

Iti New Kibongan, nagreggaay ti rimmuka a daga ket ginaburanna dagiti pagtaengan iti babaen ti bantay. Naireport a nasurok a sangagasut ti natay iti nasao a landslide.

Iti daytoy a panagsubli ni Bagyo Pepeng, 227 ti nairekord a natay, 152 iti Benguet, 50 iti Baguio City ken 25 iti Mt. Province.

Naserraan dagiti tallo a kangrunaan a kalsada nga agturong iti Baguio a pakairamanan ti Naguilian road, Marcos highway ken ti Kennon road gapu iti adu a reggaay.

Maysa a rangtay iti nagbedngan ti Sison, Pangasinan ken Rosario, La Union ti narsuod iti tengngana ket kapilitan nga aglikaw dagiti lugan iti Urdaneta, Manaoag, San Jacinto ken San Fabian sada magna iti Damortis tapno makadanonda iti Siudad ti San Fernando.

Iti Pangasinan, nagdinakkel ti karayan iti pannakaibulos ti danum iti San Roque Dam tapno maksayan ti naurnongna a nakadadaelan ti dike ti Bayambang a salaknib dagiti lumugar iti asideg ti karayan ken nakalayusan ti nasurok a 30 nga il-ili ti Pangasinan a pakaibilangan ti Asingan, Balungao, Basista, Bautista, Bayambang, Binalonan, Sta. Barbara, Dagupan City, Mangaldan, Natividad, Rosales, San Fabian, San Jacinto, San Manuel, San Quintin, Sta. Maria, Manaoag, Mapandan, Pozorrubio, Sison, Tayug, Umingan, ken Villasis.

Iti laengen Rosales, naipadamag a nasurok a sangaribu nga agindeg ti nakubong gapu iti nadaras a panagdinakkel ti danum nga aggapu iti karayan.

Rimmuar ti Bagyo Pepeng iti South China nga agturong iti Hongkong iti malem ti Oktubre 10.

Iti makalawas a panangsanotna ditoy Amianan a Luzon, kinadamsak ti indateng ni Bagyo Pepeng gapu iti panagsagrap iti layus ken landslide dagiti nadumaduma nga ili iti Cagayan, Aurora, Ilocos Norte, Ilocos Sur, La Union, Pangasinan, Abra, Cordillera ken pakairamanan ti siudad ti Dagupan ken Baguio ken dadduma pay a probinsia ken nakaro a pannakadadael dagiti sanikua ken inprastruktura ken pannakaungaw ti ginasut a biag.

Iti kaudian a report manipud iti National Disaster Coordinating Council (NDCC), agdagupen iti 375 ti natay iti Bagyo Pepeng, 185 dagiti nasugatan ken 48 dagiti mapukpukaw.

Iti kadagupan a bilang ti natay, 287 ti naggapu iti Cordillera Administrative Region, 75 iti Ilocos Region idinto a walo iti Central Luzon, maysa iti Southern Tagalog ken uppat iti Bicol Region.

Segun pay iti NDCC, agdagupen iti 675,681 dagiti pamilia wenno 3,136,965 a tattao ti naapektaran ni Bagyo Pepeng. Agdagup met iti 36,349 dagiti pagtaengan a dinadael ti bagyo ken umaboten iti P8.142 bilion ti nadadael iti inprastruktura ken agrikultura.

Ditoy Ilocos Sur, iti pinal a report manipud iti Provincial Disaster Coordinating Council, 74,825 a pamilia a buklen ti 340,290 nga agindeg manipud iti 640 a barangay iti Ilocos Sur ti naapektaran iti Bagyo Pepeng

Mapattapatta nga agdagup iti nasurok a P300 milion ti pateg ti agrikultura ken inprastruktura a dinadael daytoy a bagyo.#