Footer

SARITA: Pusta ni Ayat (Umuna a paset)

Maipatpatayaben ti graduation song manipud iti sound system iti multipurpose pavement ti barangay a mangipasimudaag iti dandanin pannakairugi ti panagmartsa dagiti agraduar iti Nagbayruangan Elementary School.

Iti siledna, sinirig pay naminsan ni Dan ti langana iti dakkel a sarming ti aparador. Penpennekenna no mayataday met laeng iti okasion ti napilina nga aruaten. Checkered a polo, maong a pantalon ken nalabaga nga sneakers a sapatos. Pinidutna ti gel iti lamiseta ket pinulagidanna ti apsay a buokna.

“Dan, rummuarka ditan, barok. Kababain no sika ti iyur-uray dagiti mamaestra,” impukkaw ni Nana Diling nga inana nga agkupkupin iti linabaanna iti salas.

Napaisem ni Dan. Kasla mas excited pay ti inana ngem isuna a mapan agsarita iti tallaong. Idi la kanikatlo nga aldaw nga impakaammo ni Maestra Hydie nga isu ti napili a naisangsangayan a sangaili iti graduation ceremony ti eskuela a nagturposanna iti elementaria, sangapulo ket uppaten a tawen ti napalabas.

Pinugsitanna ti polona iti bangbanglona a Hugo Boss ket nagdardarasen a rimmuar.

“Mayat met laengen toy suotko, Nang?” pinagunianna ti inana a nalabsanna iti salas.

“Wen. Maymayat dayta ta saan unay a pormal. Ad-adu ti aggusto kenka a babbalasang iti dayta a pormam, barok,” inkatawa ni Nana Diling a nangsirig iti langa ni Dan.

“Ania ket ni Nanangen. Kunam la dayta ta anaknak,” insungbat ni Dan ket sinakayannan ti maris naranghita a motorna.

Nakapilan dagiti agraduar a kaduada dagiti nagannak, mamaestra ken sangsangaili idi dumanon ni Dan iti pakaangayan ti graduation ceremony. Dagus a sinabat ni maestra Hydie a nangiyukkor iti lei iti tengngedna. Naiwaragawag ti panagmartsa dagiti agraduar ken nagannak. Iti ilalabasda iti tallaong, mababain ni Dan ta nakataliaw kenkuana dagiti tattao nga immay nagbuya. Manmanoda ngamin a makita ti baro ta kanayon met nga adda iti kabisera. Masansan a rabiin no makaawid. No dadduma, uray piesta opisial wenno Sabado ken Domingo, adda latta trabahona.

Iti panagturong dagiti agraduar ken nagannak iti nairanta a pagtugawanda, nakikaabay ni Dan iti superbisor ti distrito, ti prinsipal ken kokonsehal ti ili iti makinsango a tugaw. Isu pay laeng ti pannakakitana iti naganna a naimarka iti telon iti entablado.

Mr. Dan Neil Tagupa

Broadcast and Print Journalist

Batch ‘95

Guest of Honor and Speaker

Kalpasan a naiyawat dagiti diploma ken panagbitla ti balediktorian, naisaruno ti panangiyam-ammo ni Maestra Hydie iti naisangsangayan a sangaili. Dinakamatna ti panaggraduar ni Dan a balediktorian manipud Grade I agingga iti Grade VI iti Nagbayruangan Elementary School, ti panaggraduarna iti kolehio a nangalaanna iti kurso nga AB-Masscom, ti kinareporterna iti kakaisuna a telebision iti probinsia ken kinamannuratna iti agduduma a lokal a pagiwarnak ken iti Bannawag. Dinakamat pay ti maestra ti pannakapili ni Dan a maysa kadagiti awardees iti national journalism awards iti napalabas a tawen.

“Kamaudiananna, baro pay, apo, daytoy naisangsangayan a sangailitayo iti tawenna a duapulo ket pito. Ita, adtoy ngaruden ni Mr. Dan Neil Tagupa,” inggibus ti maestra.

Natibong a sipsipat ti nangitulod kenkuana iti entablado. Nagulimek met ti tallaong idi rugiannan ti agsarita.

Maysa kadagiti agbuybuya ni Ishty. Iti tawenna a duapulo ket dua, maysan a naan-anay a narse. Nagawid ditoy barangayda manipud iti Manila a nagbasaan ken nangalaanna iti eksaminasion. Napudaw ken napino ti kudilna, addaan iti makaalino a pammagi. Lalo pay a makapagargari ti isemna a mangipakita iti braces iti ngipenna. Adu a babbaro ti barangayda ti matiritir ti tengngedda no lumabas.

Kadua ni Ishty ni Carmela, ti barkada ken dati a kaeskuelaanna iti elementaria ken sekundaria.

“Ni met gayam Dan dayta guest speaker, fren,” inkidag ni Ishty ken ni Carmela.

“Wen. Ti misterioso a baro, he! he!” insungbat ni Carmela.

“Hmm. Nakaserserioso. Lalo pay a mangpapormal ti eyeglassesna. Ngem kitaem fren, bagay la unay kenkuana ti aruatna.”

“Sus denggem ketdi ti ibagbagana.”

“Sabali la a talaga ti journalist aya. Adda bagas ti sarsaritaenna.”

“Hey, ita man pay a kasta ti panagsasaom. Dimo kunaen nga adda naisangsangayan a riknam ken ni Manong Dan, fren,” immulagat ni Carmela ken ni Ishty.

(Adda tuloyna)