Footer

TUNGTONG-ARUBAYAN: Nakakaapal a Kinapudno (Maudi a paset)

Nalawag ti turongen dagiti balikasna: dagiti nakapsut ken awan durina a linlinteg—adu a linteg ngem saan a maipatpatungpal ken di matungtungpal wenno nairamanda laeng iti buntuon dagiti immunan a naigabsuon a linlinteg a di pulos maikaskaso ti kinapategda. Nabuntog ti judicial system ta abutenna ti mano a tawen a maresolbar ti simple laeng a kaso, a no dadduma ket madyiken dagiti makunkuna a hoodlums in robes, ken kangrunaanna amin, ti saan a masapulan nga anniniwan ti kinapudno a panagserbi.

Kinuna pay ni Kwok: “…here lawmakers failed tremendously because the corruption law is terrible and inadequate. They also failed miserably in providing the Office of the Ombudsman investigative powers.”

Linagidaw unay ni Kwok dagiti agar-aramid iti linteg ta nagaramid ken nangipasada kadagiti linteg nga agkurang ti ngipenda a mangbakal iti kurapsion. No imurian a nalaing ti naaramidan ti Kamara ken Senado iti agdama, awan makitam a lumtuad no di dagiti privileged speeches, panagaapa ken panagsisinnubang, panangipapilit iti kayat ti adda iti poder uray no saanen a kayat ti kaaduan—a kasla ketdin kabaelanda pay laeng a ballikugen ti timek dagiti umili. Iti ababa a pannao, awan san ti namnamaen a napudno a panagserbi dagiti makunkuna nga agserserbi!

Ti kurapsion ti sakit ti gimong a saan a pulos a maag-agasan. Nupay makitkita ken marikriknan ti impalayna a babantot, saan a maikaskaso a sarangten wenno ipaayan iti solusion. Ngem saan a daydiay kinaawan ti masarakan nga agasna no di ket kinaawan ti kinapudno dagiti agtuturay a mangagas koma iti dayta a sakit.

Pudno la unay ti kuna ken pammaliiw ni kolumnista Conrado de Quiros maipapan itoy a banag: “This is corruption in every sense of the word, the kind that has to do not just with adulteration but with rottenness and decay. This is pillage of the deepest, fiercest, most terrifying kind, the kind that doesn’t just turn people into paupers but into zombies.” Adda ngamin makagapu itoy nga imbagana: “Power corrupts, and absolute power corrupts absolutely.”

Di nakakaskasdaaw no karaman ti Pilipinas kadagiti pinakakurap a pagilian iti Asia. Iti scale of 1 to10, immabuten iti 9 ti kangato ti rangko ti korapsion iti pagiliantayo, segun iti surbey nga inwayat ti Hong Kong-based Political and Economic Risk Consultancy (PERC). Daytoy a kurapsion ti puon ken gapu ti panagrigrigat ti kaadduan nga umili. Daytoy ti makagapu iti dumakdakkel a giwang iti nagbaetan ti napanglaw ken nabaknang. Gapu iti kurapsion, bumakbaknang dagiti nabaknang ken pumangpanglaw dagiti napanglaw.

Lapdan ti kurapsion ti panagdur-as. Ngem idinto a maibilang daytoy nga immoral nga aramid, naruay latta dagiti mangakkub kadagiti dua a dakulapda sada buyogan iti pakidem, darumog wenno patangad a panagparintumengda iti baet ti dir-i dagiti amen ken alleluia iti aglawlawda.

Kinapudno. Dayta ti manmano a masarakan kadagiti agtuturaytayo, lalo iti ngarab ti panagserbi.#