Footer

BANNER NEWS: Linia ti kompania ti telepono, masabsabotahe?

Task force mabuangay tapno marisut ti problema

VIGAN CITY – Masabsabotahe dagiti linia ti maysa a kompania ti telepono ditoy siudad?

“Saantayo a mabalin nga ikkaten daydiay…” kinuna ni Deputy Chief of Police Maximo Taclas idinto nga innayonna a ti laeng kable ti telepono ti Digitel ti mairepreport a mataktakawan ditoy siudad.

Iti panagpalawag ni Digitel District Manager Sumabat iti konseho ti siudad ditoy idi Nobiembre 9, dinakamatna a sangapulo ket innemen ti inreportda iti polis a kaso ti panagtakaw kadagiti kable ti telepono ti kompaniada iti nadumaduma a paset ti siudad ngem saan latta a maguped ti panagtakaw kadagitoy.

Ngem segun ken ni Taclas, lima laeng ti “nakalkalda” a report ti panagtakaw iti kable ti telepono ti Digitel idinto a kinunana a saan koma a maipabasol ti amin iti polis agsipud ta “no dagiti laengen kable ti telepono ti bambantayanda iti 24 nga oras”, maliwayanda metten dagiti sabali a pagrebbenganda kas iti pannakatagiben ti urnos ken talna iti siudad.

Napaayaban ni Sumabat iti sangguniang panlungsod ditoy tapno lawlawaganna no apay a di met laengen maisubli ti serbisio ti telepono iti sumagmamano a barangay iti dumaya idinto a nabayagen a naireport ti problema iti opisinada.

Sumagmamano pay a reklamo ti naidanon iti DWRS mainaig iti mapapati a di panangitaltalek ti Digitel iti pannakatarimaan ti teleponoda iti baet a makabulan wenno nasursurok payen ti napalabas manipud inreklamoda ti problemada.

Maysa kadagiti nagreklamo ti Tawid News Magasin agsipud ta agdua bulanen nga awan ti dial tone ti telepono ti opisina iti baet ti mamimpaten a panangikari ti Digitel a tamingenda iti kabiitan a tiempo ti nasao a problema.

Idi damo, ti Bagyo Pepeng ti pambar ti Digitel a makagapu iti kaawan ti serbisiona ti telepono dagiti nagreklamo.

Ngem iti idadatagna iti sangguniang panlungsod, kinuna ni Sumabat a ti agsasaganad a pannakatakaw ti kable ti telepono iti nadumaduma a paset ti siudad nangruna iti dumaya a barangay ti makagapu iti problema ti saan a nasayaat a serbisio ti telepono ti kompaniada.

Naammuan a natakaw ti kable ti telepono ti Digitel iti Barangay San Julian Sur, Bulala, Pong-ol, nagbedngan ti Ayusan ken Bulala, Beddeng Daya ken kaudian ti Tamag ditoy siudad ken iti Naguilian iti Caoayan.

Ngem kinuna ni Taclas a saan a kaya dagiti polis a bantayan dagiti amin a linia ti telepono ti nasao a kompania iti 24 nga oras isu nga idi isu pay ti mangidaulo iti kapolisan ditoy siudad, dinawatna idi kadagiti barangay captains a mausar dagiti tanod a tumulong iti polis iti pannakabantay dagiti linia ti telepono iti barangayda.

Kanaig daytoy, impakaammo ni Taclas a napagnummuanda ken ni Col. Menardo de Guzman, hepe ti polis ditoy siudad, ti pannakabuangay ti maysa a task force para iti pannakasolbar ti problema ti panagtakawan iti kable ti telepono.

“Saan laeng a polis ti mangbukel iti task force no di pay dagiti personnel ti maseknan nga ahensia tapno ipakitada a saan laeng a ti agrepreport ti aramidda no di interesadoda a tumulong iti pannakarisut ti problema,” kinuna ni Taclas.#