Footer

5 lugan, nagkarambola iti kalsada, 1 natay

SANTA LUCIA, Ilocos Sur. -Lima a lugan ti nagkakarambola a nakatayan ti maysa ken nakasugatan ti dadduma iti national highway a sakup ti Barangay Angkileng ditoy nga ili.

Nainaganan ti natay a ni Herminia Dasalla ti Santa Maria, Ilocos Sur idinto a naitaray iti ospital dagiti nasugatan a biktima.

Karaman iti karambola ti motorsiklo a Kawasaki Fury, minaneho ni Amancio Dasalla, kalubbonna ti asawana a ni Herminia Dasalla, mangisursuro, residente iti Lingsat, Santa Maria, Ilocos Sur; ti traysikel nga addaan plaka FX-8414 a minaneho ni Ernesto Fernando a nagluganan met ni baketna a ni Gloria Fernando, agpada a residente iti Namatican, Santa Lucia; Suzuki a motorsiklo, addaan plaka 5499-AE a minaneho ni Paul Jomar Aquino, 21, residente iti Barangobong, Santa Lucia; Florida Bus, addaan plaka BVS-524 a minaneho ni Paulino Richard Delegado, residente iti Fairview Park, Quezon City; ken Toyota Revo, addaan plaka SGS-702 (red plate) a minaneho ni Benjamin Lucena, residente iti Dalumpinas Oeste, San Fernando City, La Union.

Naammuan iti inisial nga imbestigasion nga idi adda iti sango ti municipal station ti agpaabagatan a Revo, nadungparna ti sango ti motorsiklo a Fury ken maysa a traysikel ket dinungpar met ti traysikel ti Florida Bus a nakasardeng ta madama nga agiluglugan.

Nagdiretso latta ti Revo ket nadungparna ti maysa manen a motorsiklo ket indarusdosna daytoy agingga idi maidungpar iti poste ti koriente.

Mapapati a nabartek ti drayber ti government vehicle.

Agtultuloy ti imbestigasion ti pulisia.#