Footer

BANNER NEWS: Ilokano a mannurat, naganna nausar iti pammallaibo

HAWAII – Imballaag ti maysa nga Ilokano a mannurat nga agnaeden ditoy kadagiti padana a volunteers, community members ken kailianna a saanda koma a sungsungbatan ti maysa nga impostor a mangar-aramat iti naganna tapno saanda a mabiktima.

Iti impatulod ni Amado I. Yoro a ballaag kadagiti kailianna babaen ti kabarbaro nga e-mailna, kinunana a maysa nga impostor ti mangar-aramat iti naganna ken ti daan nga emailna nga agkidkiddaw iti tulong agsipud ta natakawan iti biahena ket kasapulanna ti pinansial a tulong tapno makaawid.

“Saan a siak dayta nga impostor nga agdawdawat iti gatad ti kuarta … nga ibagbagana a napukaw ti walletna, nga adda iti UK, Scotland, Nigeria wenno London,” kinuna ni Yoro.

Iti email a naawat ti Tawid News Magasin manipud ken ni “Amado Yoro”, [email protected], nagkiddaw daytoy iti tulong agsipud ta natakaw amin a kuartana ken ti bagna a naglaon iti pasaportena bayat ti kaaddana iti dalan nga agturong iti otel a pagdagusanna.

“…Unfortunately for me all my money got stolen on my way to the hotel where i lodged along with my bag were my passport was , And since then i have been without any money i am even owing the hotel here.

So i have limited access to emails for now, please i need you to lend me about $2,000 dollars so i can make arrangements and return back I am full of panic now…” kinuna ti maysa a paset ti saan nga agsusurot ti Englishna a surat.

“i have spoken to the embassy here but they are not responding to the matter effectively, I will return the money back to you as soon as i get home…” kinuna pay ti email.

Ngem iti ballaag nga impaw-it ni Yoro babaen ti baro nga emailna, kinunana a di pay nagbiahe iti UK.

“Addaak ditoy Oahu, Hawaii a kaadduan a makitadak kadagiti organization meeting,” kinuna ni Yoro iti baro nga emailna idinto nga innayonna nga awan ti panggepna nga agbiahe iti ruar ti USA kadagiti masungad a tawen.

Segun ken ni Yoro, duan ti nabiktima ti hacker, maysa ti nangipatulod iti $1,596.00 idinto a $2,600 ti maikadua.

Inyunay-unay ni Yoro: “Saankayo koma a paallilaw, kakabsatko. Saanyo a sungbatan, saanyo a patien, saanyo a patulodan dayta mannibrong ken puso ti narugit ken mangdadael iti tao.”

Kinuna ni Yoro a mababain payen agsipud ta adda dagiti nairamraman a naallilaw babaen ti di pay am-ammo a hacker.#

Comments are closed.