Footer

EDITORIAL: Pilipinas, nagbalinen a kapeggadan a pagtrabahuan dagiti journalists

Nagbalinen ti Pilipinas a kapeggadan a pagilian para kadagiti journalists gapu iti napasamak a masaker iti Maguindanao a nakatayan ti 59 a tattao a pakairamanan ti nasurok a 20 a journalists.

Nagkintayeg ti sangalubongan iti naisayangkat a kinadamsak iti komboy ti asawa ti maysa kandidato a para gobernador a pakairamanan dagiti kameng ti media no sadino a naukkon dagitoy iti abay ti nakali a nauneg nga abut sada naparatupot ken naitapuak ken nagaboran.

No awan ti dagus nga immarayat a soldado, posible a di koma nalukaisan daytoy nakaam-ames a pammapatay a maitudo a kangrunaan a suspetsa ti anak ti maysa a political kingpin iti Maguindanao.

Naidarumen ni Andal Ampatuan, Jr., maitudtudo a kangrunaan a suspetsa iti masaker. anak ni Ampatuan, Sr. a naggobernador iti Maguindanao manipud idi 2001 sana impasublat ti puestona iti anakna a ni Sajid. Ni Andal Jr. ti agkandidato koma a para gobernador iti masungad nga eleksion.

Awan ti panagduadua a politika ti adda iti likudan ti pammapatay.

Saan met a malibak nga asideg a kaaliado ti administrasion Arroyo dagiti Ampatuan. Iti eleksion idi 2004, insagutda ken ni Presidente Arroyo ti solido a suporta a maysa kadagiti nakaabakan ni aktor a Fernando Poe, Jr. a kinasalip ni Pres. Arroyo iti kinapresidente. Idi 2007, naibbong amin a kandidato ti oposision iti Maguindanao, maysa nga improbabilidad a mapasamak iti eleksion.

Makapariribuk ti napasamak a kinadamsak iti Maguindanao. Ngem uray sakbay daytoy, kinuna ti International News Safety Institute nga agdagupen iti 74 dagiti journalists ti napapatay iti las-ud ti walo a tawen iti babaen ti administrasion ni Pres. Arroyo.

Ti makadakes, segun iti INSI, up-uppat pay ti nakonbiktaran.

Ngem kasano koma a masalakniban dagiti journalists iti panangibaklayda iti pagrebbenganda tapno maammuan dagiti umili ti pudpudno a mapaspasamak iti pagilian?

Kinuna ti INSI a kasapulanen nga iyimplementar ti United Nations Security Council dagiti addang a naipalaon iti resolusionna para iti karadkad dagiti journalists.

Idi 2006, nangipasa ti UN Security Council iti maysa a resolusion a nangbilin kadagiti amin nga estado a kameng a mangigibus iti pannakapapatay dagiti journalists.

Ngem ti saludsod: umdas kadi daytoy iti sanguanan ti mapaliiw a nabuntog a pannakarisut dagiti kaso dagiti agiwarwarnak a biktima dagiti extrajudicial killings iti sanguanan ti mapapati a nakurang a panangitaltalek ti gobierno iti pannakaisaklang dagiti nakabasol tapno maikkan dagiti biktima iti hustisia?

Kas umuna nga addang, rebbengna a makumpiska koma amin nga agraraira nga armas iti ima dagiti politiko iti Mindanao. Awanen ti panagaripapa dagitoy a pumatay no adda peggad iti kinatalingenngen ti bileg ken turayda ket marubirob laeng daytoy no madis-arma amin dagiti nagtagiigam a pasurotda.

Maaramid daytoy no adda political will ti gobierno a mangbilin kadagiti kapolisan ken kasoldaduan a mamagbalin iti Mindanao a gun-free iti masungad nga eleksion.#