Footer

INDAYON NI LAGIP: Beggang (Umuna a paset)

Naimbag nga aldawmo a sangbayan daytoy suratko. Maysaak kadagiti naruay nga agdengdengngeg iti programam. Makaay-ayo ken makaited inspirasionda. Daytoy ti rason no apay a naallukoyak a mangipatulod kenka daytoy a suratko.

Awagannak laengen iti Alicia, agnaed ditoy Ilocos Sur. Apaglabes a 25 ti tawen. Maysaak a separada, ken addaan iti maysa nga anak.

Tawen 2001 idi agkasarkami ken Freddie.

Adu a kalugaranmi ti nakiboda. Binagbagaan ken sinutildakami dagiti barkadami.

“Lalaingenyo tapno adda insigida anakyo,” insutilda.

Naragsak dagiti umuna a bulan ti panagdennami. Kasla awan patinggana. Nadungngo kaniak ni Freddie. Romantiko. Kaslaak nagango a kayo a nagdaras a gumil-ayab no lailuennak ti asawak.

“Dua laeng ti kayatko nga anak, lakay,” nakunak. “Maysa a babai ken maysa a lalaki. Tapno sigurado a maikkanta ida iti narungbo a masakbayanda.”

“Kaniak, honey, kayatko a maysa a dosena. No ad-adu, naragragsak. Maymayat ti naragsak a pamilia.”

“Ay, mandiak. Malosiangnak nga insigidan no kasta. No losiangakon, isukatnakton iti naub-ubing.”

“Uray kaanoman, dikanto isukat, honey. Sikanto latta ti numero uno ditoy pusok,” kinuna ni Freddie.

Kastoy ti kinaragsakmi, Manong Danny. Kanayon a nabara ti rabii. Anian a gasatko, nakunkunak. Ta nataer la ngaruden ni lakay, nalailo pay. Awanen ti sapulek pay.

Konduktor ti bus ni lakay. Ilocos Sur-Manila ti biahena. Tunggal lawas nga aggawid ditoy balay.

Maysa a malem, nakaragragsak ni lakay a simmangpet.

“Baket, simmangpetakon. Uy, adda pasarabok kenka. Blusa ken pantalon. Ginatangko pay dayta idiay Manila,” kinunana “Naalak ti bonusko isu nga inggatanganka.”

“Uray siak, adda met sorpresak kenka,” insungbatko.

“Ania met ti sorpresam kaniak? Baka adda nakitam dita ili a kayatmo a gatangen, ania?”

“Maysakanton nga ama!”

“Masikogka?” napamulagat ni Freddie a nangperreng kaniak. Idi kuan, insalasalanak iti ragsakna.

Diak napupuotan, inserreknak iti kuarto. Nagbalin manen a nakabarbara iti kuartomi iti dayta a sardam.

(Adda tuloyna)

Comments are closed.