Footer

Political kingpin latta dagiti Singson iti Ilocos Sur iti masungad nga eleksion

VIGAN CITY- Agpayagpag latta dagiti ag-Singson iti eleksion inton Mayo 2010. Ditoy probinsia, dagiti Singson dagiti naibayog a kandidato para kadagiti nadumaduma a kangrunaan a posision iti masungad a panagpipili nga ad-adda a mangsemento iti bilegda kas political kingpins iti probinsia.

Nagsaruno a nagipila idi Nobiembre 25 ni Deputy National Security Adviser Luis “Chavit” Singson iti COCna kas gobernador iti probinsia, ken ti anakna a ni Cong. Ronald Singson nga agpailayon a mangibagi iti umuna a distrito ti Ilocos Sur.

Sakbayna, imparipirip ni laklakay a Singson ti panagsublina iti politika tapno ituloyna ti programana nga industrialisasion ti probinsia.

Nagpababa ni Gov. Deogracias “Victor” Savellano a para bise gobernador ken ni Vice Gov. Jeremias Singson para bokal.

Sabali pay nga anak ni Usec Singson, ni Ryan, ti sumublat a bise mayor ti Vigan City agsipud ta awan ti kasangona.

Awan met ti kasango ni agdama a Mayor Eva Marie Singson-Medina. Daytoy ti maikadua a termino ni Mayor Medina.

Indatag metten ni Germie Singson-Goulart ti kandidaturana para mayor ti Caoayan, kasangona ti kabsat ni Mayor Mario Tugade nga agturposen ti terminona. Katiket ni Goulart ni incumbent Vice Mayor Gemma Cabaong.

Sublaten met ni dati a Candon City Mayor Grace G. Singson ti puesto ni Cong. Eric Singson a kaingungotna nga agturposen ti termino inton 2010.

Manamnama met ni Mayor Allen Singson a mailayon agsipud ta awan ti makita a napigsa a kasangona. Maysa pay a Singson ni Konsehal Alfonso Singson ti kandiato a para bise mayor.

Kabayatanna, maysa a dati a diputado ti timmakder a sumango iti puersa dagiti Tadena ditoy nga ili.

Impila ni dati a Congressman Mariano Tajon ti kandidaturana para mayor iti Municipal Comelec office ti Sto. Domingo a katiketna ni agdama ken pailayon a bise mayor Antonio “Boy” Que.

Kasango ni Tajon ni Amado Tadena, kabsat ni Mayor Floro Tadena nga agkandidato a para bise mayor iti eleksion inton 2010.

Segun ken ni Tajon, adda nagtutulaganda kada dati a Cong. Salaknib Baterina ken Bokal Domingo Tesoro nga “isu ti inkam balonen a makibakal iti daytoy a politika.”#

Comments are closed.