Footer

SALAYSAY: Ritual a Bogwa: Tapno agtalna ti kararua dagiti Hapon a biktima ti Maikadua a Gubat-Sangalubongan (Umuna iti Dua a Paset)

Nagur-urnong ti gobierno ti Japan kadagiti rurog, tultulang ken bangabanga dagiti natay a Hapon idi Maikadua a Gubat Sangalubongan sada pinuoran ken indulin ti dapoda. Napasamak daytoy babaen ti panangipagna ti Kuentai Investigations, maysa a non-government organization iti pagilian ti Hapon tapno magun-od ti kappia ken talna dagitoy a biktima ti nadangkok unay a maikadua a gubat-sangalubongan ken tapno maragpat dagiti kameng ti pamiliada ti kinatalinaay ti nakem. Kaasping la unay ti ritual dagiti Hapon kadagiti napasag iti pagbabakalan a minatayda ti ritual a bogwa ti Ifugao. Sadiay Kiangan, Ifugao a simmuko ti Tigre iti Malaya, ni Heneral Tomoyuki Yamashita.

Kaasping pay ti ritual a bogwa ti ritual dagiti Hapon a Shokotsu Shiki ti panagurnong kadagiti skeletal remains dagiti napasag a soldado a Hapones ken sibilian nga empleado ti gobierno ti Hapon a napasag iti kallabes a maikadua a gubat sangalubongan. Iti ritual ti bogwa, kalpasan a naurnong dagiti skeletal remains dagiti napasag wenno pimmusay, maikararaganda sadanto maidulin. Napuoran dagiti naurnong nga skeletal remains ti Shokotsu Shiki ket naikabil ti dapoda iti dakkel a pagurnongan.

Nasken a maiwayat daytoy ta mapattapatta a dakkel ti dagup dagiti natay a Hapon ditoy pagilian idi maikadua a gubat sangalubongan. Segun iti data ti website ti Kuentai Investigations, mapattapatta nga adda 520,000 a natay a soldado ken civilian employees lalona iti probinsia ti Leyte, Cebu ken iti Amianan a Luzon kangrunaanna iti Cordillera. Kameng dagitoy a soldado a Hapon iti 16th army division ti Japanese Army ken maipagarup a nagtaudda kadagiti prefectures ti Kyoto, Shiga, Fukui ken Mie.

Nasken nga aramiden dagiti Hapon daytoy a banag a kas kanayonan iti pannakailagip manen ti panangitinnag ti gobierno ti USA iti atomic bomb sadiay Hapon. Napasamak ti immuna a panangitinnag ti bomba atomika sadiay siudad ti Hiroshima idi Agosto 6, 1945 ken simmaruno iti siudad ti Nagasaki idi Agosto 9, 1945. Nagsagrap iti adu a casualties ti Hapon ket immabot iti 140, 000 ti natay sadiay Nagasaki ken 80,000 sadiay Hiroshima . Dagiti nakalasat iti panagbomba ket nagsagabada iti naduduma a sakit a gapuanan ti radiation.

Dayta a pannakaitinnag kadagiti nabibileg a bomba ti puon ken gapu ti isusuko ti gobierno ti Hapon kadagiti Allied Forces nga indauluan ti USA, Canada ken United Kingdom. Ditan ti nagultimuan ti maikadua a gubat-sangalubongan.

Nakali dagiti naurnong a rurog ken dadduma pay a tultulang dagiti maipagarup a natay a Hapon manipud iti Leyte, Mindoro, Cebu, iti Cordilleras partikular ti naduduma nga ili ti Ifugao, iti siudad ti Baguio, iti Benguet ken iti Nueva Vizcaya.

Napasamak met ti panagurnong kadagiti rurog iti Metro Manila, ngem kinompiskar dagiti pannakabagi ti integ dagitoy ken naidarum pay dagiti Hapon gapu iti panaglabsingda iti linteg. Natiliw ditoy ni Kazuya Tomita ken dagiti kakaduana gapu iti panaglabsingda iti Presidential Decree 374 wenno Cultural Properties Preservation and Protection Act ken iti Presidential Decree 856 wenno ti maaw-awagan iti Code of Sanitation gapu iti panagibiaheda kadagitoy a naurnongda a rurog nga awanan iti pammalubos ti gobierno.

(Adda tuloyna)

Comments are closed.