Footer

SARITA: Pusta ni Ayat (Tuloyna)

Makais-isem ni Carmela a timmakder iti abay ni Ishty sakbay a makaasideg ni Dan. Limed kadagiti dua, napanna inarasaasan ti para yawag.

“Daytoy a sonata ket nairanta a pagsalaan ti mannurat a patanor ti Nagbayruangan, ni Dan,” inwaragawag ti emcyee.

Kinita ni Dan ni Ishty.

“May I have this dance, baby?”

“Sure, baby,” inyisem met ti balasang.

Bayat ti panagturongda iti salonan, naipatayaben ti “Fall for You” ti Secondhand Serenade.

Agtigtigerger dagiti ima ni Dan a nangiggem iti siket ni Ishty. Kasla dina maiperreng dagiti matana iti balasang. Aminenna, saan a naruam a makisalsala.

Hold your breath

Because tonight will be the night

That I will fall for you over again

Don’t make me change my mind

I would live to see another day

I swear ”ts true

Because a girl like you is

Impossible to find

Impossible to find.”

“Relax ka lang, baby,” inyarasaas ni Ishty bayat ti panangirakusna kadagiti takiagna iti tengnged ti baro. Iti kinaasidegda iti tunggal maysa, arig agdekketen dagiti barukongda. Marikriknan ni Dan ti bara ti sang-aw ti balasang.

“Ishty, baby, I think I have something to say,” binurak ni Dan ti ulimek iti nagbaetanda.

“Yes?”

“Iti agmakabulan a panagtintinnextta, mariknak nga agayatakon kenka.”

Tinangad ti balasang ni Dan. Husto kadi ti nangngegna? Adtoy ita nga ibagbaga ti baro ti ayatna idinto a kasla dina ammo ti agarem wenno dina masango ti agayat.

“Kunak man no awan ti appealko kenka?”

“Akuek, Ishty, saan a sika ti babai nga arapaapko. Ngem nagbaliwen dayta. Sikan ti sapsapulek iti tunggal aldaw,” pinerreng ti baro ni Ishty.

In-inut a naikawes ti nasam-it nga isem iti bibig ni Ishty.

“Let me hear the words, Mr. Tagupa.”

“I do love you, Ishty.”

“I love you too, Dan.”

Iti dayta a gundaway, awanen ti bibiangda iti aglawlaw. Kasla is-isudan ti tao iti salonan. Sada laeng nagsubli iti tugawda idi malpasen ti sonata.

Makalawas ti napalabas. Bayat ti pannagna dagiti dua iti kadaratan iti igid ti baybay, impakaammo ni Ishty ken ni Dan ti panagsublina iti Manila.

“Dan, baby, agsubliakon sadiay Manila inton bigat,” insadag ti balasang ti ulona iti abaga ti baro.

“Manila? Kunak man no dikan agsubli sadiay?” naisardeng ni Dan ti nagna.

“Innak agatendar iti oathtaking ceremony. Ammom met a kaipaspasak ti licensure exam iti nursing”

“Wen gayam. Pasensiakan, kayatko koma ti kumuyog tapno saksiak ti panagsapatam ngem nagadu met a pakakumikomak ita iti trabaho,” naisennaay ti baro.

“Maawatak met ti situasion, baby.”

“Mano nga aldawmo ngarud iti Manila?” inrakus ni Dan ti imana iti siket ni Ishty.

“ Dua a lawas. Kalpasan ngamin ti oathtaking, lakadekto pay ti lisensiak iti opisina ti PRC. Ikanayonkonto payen ti mangala iti kopia ti transcript of recordsko iti eskuela,” insungbat ti balasang. Iti panunotna, makipagkitanto iti boyprenna sadiay tapno gibusannan ti relasionda. Nupay nabiitda pay ken ni Dan, ammona nga ipatpateg unay ti baro. Saan a kas iti immuna a boyprenna a seloso. Kasla awan panagtalek daytoy kenkuana a gfna. Ket saan a napupuotan ni Ishty nga inagkan ti bibig ni Dan a nakapaspasnek a mangkitkita kadagiti tattao a mangguyguyod iti daklis iti saan unay nga adayo.

Liman nga aldaw ni Ishty iti Manila idi makaawat ni Dan iti text ni Kolo. Iyaw-awisna ti panaginumda iti balayda. Adda kan napateg nga ibagana. Nupay adda koma nasken nga ubraenna, iniddep pay laeng ni Dan ti laptopna. Pinidutna ti kallugongna ket tinurongnan ti motorna tapno pagustuanna ti awis ti gayyemna a kasinsin ni Ishty.

Nakasaganan iti rabaw ti lamisaan ti inumenda a redhorse idi dumanon ni Dan iti balay da Kolo. Adda met dua a natuno a buslogan a pulotanda. Dagus nga inyawat ni Kolo ti bote ti serbesa ken ni Dan. Dandanidan maibbus ti linaon ti ti maikadua a bote idi damagen ni Dan ti gapu ti nangpaayaban ni Kolo kenkuana.

“Bro, saan koma nga agsakit ti nakemmo itoy nga ibagak kenka ngem saanko a mabalin a baybay-an ti panangloko ni kasinsin Ishty kenka,” impormal ni Kolo kalpasan ti panangpaatianna iti bote.

“Ania ti kayatmo a sawen, bro? Awan met ti problema iti nagbaetanmi ken ni Ishty.”

“Bro, kasinsinko ni Ishty ken kayatko la unay no agbalinka a kayongko. Ngem rumbeng laeng a maammuam nga addan boyprenna sadiay Manila a mabalin a kaduana ita,” insennaay ni Kolo. “Dakkel ti babawik a nangited iti numerom kenkuana. Ti ammok, adda laeng ibagana kenka. Ngem idi sakbay ti koronasion, nangngegko ti saritaanda ken ni Carmela. Pinagpinnustaandaka laeng, bro!”

(Adda tuloyna)

Comments are closed.