Footer

10,000 indigents, maipaayan iti Philhealth Cards

Gapu iti nangato a bilang dagiti pamilia nga awanan iti Philhealth cards iti probinsia, maysa a memorandum of agreement ti napirmaan iti nagbaetan ti gobierno probinsial nga imbagian ni Gov. Deogracias Victor “DV” Savellano ken PhilHealth Insurance Corporation nga imbagian ni Orlando Pangilinan Jr. iti simple a seremonia a naangay iti opisina ti gobernador idi Disiembre 2.

Kinuna ni Gov. Deogracias Victor Savellano, inrusatna ti Dur-as ken Virtud para iti Benneg ti Salun-at dagiti Ilokano (DVBS) agsipud ta base iti kaudian a surbey, aganay 23,000 a napanglaw a pamilia ti awanan iti Philhealth card.

“Irugitayo iti 10,000 a pamilia agingga a maikkantayo ti 23,000 nga awanan iti philhealth card,” kinuna ti gobernador.

Kinuna met ni Sangguniang Panlalawigan Member Gerardo Lahoz, chairman ti committee on health a hospital-based dagiti maiyenrol itoy a programa. Apaman a maammuan ti ospital nga awananda iti Philhealth card dagus a maikkan dagitoy.

“Itoy a wagas, maka-reinburse dagiti ospital ti gobierno iti opisina ti PHIC nga isu ti agbalin manen a pondo dagitoy nga ospital a saan ketdi a kas ita a panay ruar ti pondo para kadagiti charity patients,” inlawlawag ni Lahoz.

Iti met biang ni Philhealth Ilocos Sur Manager Orlando Pangilinan Jr., kinunana nga addan P2 milion a nailatang a pondo para itoy a programa nga agpaut iti makatawen.#