Footer

EDITORIAL: Lakbay Aral, maysa laeng a panagpallailang

Masansan a madamagtayo ti panagpasiar dagiti official ti probinsia, siudad, ili ken uray dagiti barangay iti maysa a nalatak wenno nangab-abak iti pasalip ti gobierno a lugar tapno agoberba wenno agadalda ti maipapan iti nasayaat a panangimaton iti gobierno dagitoy, kasta met dagiti pagwadan a programa ken proyektoda. Adda awagda iti dayta – Lakbay Aral.

Napintas ti panggep ti Lakbay Aral. Adu ti mabalin a maobserba wenno maadal dagiti makipartisipar a mabalin nga ipakatda iti lugarda.

Ngem kaadduanna kadagitoy ti panagburbor laeng iti pondo ti probinsia, ili, siudad wenno iti barangay. Kadagiti sabali nga opisial, ibilangda a maysa a panagpallailang, kas gunggonada iti “serbisioda” wenno kinapudnoda iti liderato a nagtungpal iti nasayud a pannakayimplementar dagiti naipangruna wenno prioridad a proyekto.

Malagipmi ti naminsan a panag-Lakbay Aral dagiti konsehal ditoy siudad iti Boracay. Kas nakuna ti maysa a konsehal, kangrunaan a panggep iti ipapanda iti Boracay ti panangadal ken panagobserbada no kasano ti pannakaidur-as ti turismo ditoy, no ania dagiti gannuat ken programa a mabalinda nga iwayat ditoy a siudad.

Idi naggawidda, nakuna ti maysa a konsehal nga adu dagiti naadalda iti ipapanda iti nasao a lugar nga iwayatda iti Mindoro Beach tapno agbalin a Boracay iti Amianan. Mindoro Beach, mapagbalin a Boracay? Adu a kalugaran ti nagngilangil iti dayta a nangegda.

Ngem ti saan a malibak, kalpasan dayta, awanen ti nangeg pay nga inggannuat dagiti maraem a kameng ti sangguniang panlungsod iti nasao a beach tapno mapagbalin daytoy a destinasion ti turista a kas iti Boracay.

Iti met naisayangkat a Lakbay Aral dagiti barangay officials ti Baguio iti Boracay ken iti Makati idi maudi a lawas ti Septiembre ken umuna a lawas ti Oktubre, kangrunaan kano a panggep ti panagpasiarda kadagiti nadakamat a lugar tapno makitada a mismo dagiti best practices ti lokal a gobierno, no kasano ti panangmanehar iti materials recovery facilities ken no kasano a makaaramidda kadagiti proyekto manipud iti nakisang a pondo.

Ngem dakkel a nakababalawan dagiti barangay officials gapu iti panagpasiarda idinto a kadagita a tiempo, masansanot ti Baguio ken ni Bagyo Pepeng ken adun dagiti natay gapu iti landslide ken layus.

Ngem inrason dagiti barangay officials a nakaluasdan idi madamagda ti panagsubli ti bagyo.

Sabali pay a nakababalawanda ti kadakkel ti nagastosda. Agasem ti nasurok a P4 milion. Idi makuenta ti nagastos ti tunggal maysa a nagpasiar, agdagup iti P14,460. Ngem segun kadagiti napan nag-Lakbay Aral, ti innalada a tour package ti kalakaan.

Ngem uray kasano a panangikalintegan dagiti barangay officials, saan a maikkat ti suspetsa a napanda la nagburbor iti kuarta ken “nagpapaimas” iti napananna.

Iti bukodmi a biang, nupay napateg ti Lakbay Aral tapno agiinnadal dagiti opisial kadagiti maipagtangsit a gannuat ken programa iti papananda, iti daytoy a tiempo a karigat ti panagbiag, usarenda laeng koman ti mabusbosda para kadagiti programa a makatulong kadagiti nakakaasi a kalugaranda.#