Footer

Manipesto para pannakaparmek iti climate change, napirmaan

VIGAN CITY – Maysa a manipesto ti pinirmaan dagiti dagiti estudiante ti agduduma a pagadalan, dagiti adda iti academia, LGUs, mannalon ken dadduma pay a sektor ti kagimongan a makipasetda iti amin nga aktibidad a manglapped iti climate change.

Kanaig daytoy, kinuna ti gobernador ditoy probinsia a kasapulan nga agkakammayet ti amin tapno maisalakan ti planeta a pagbibiagan ti tao.

“Saan laeng a bukod ti gobierno daytoy a problema. Maseknantayo amin isu a masapul ti panagkutitayo amin,” indagadag ti gobernador bayat ti summit mainaig iti panagbaliw ti klima nga inangay ti gobierno probinsial idi Disiembre 2.

Ti Environment and Natural Resources Office ti Ilocos Sur ti nangidaulo iti Climate Change Summit a dinar-ayan dagiti nadumaduma a sektor a pakaibilangan dagiti estudiante, academia, ken dagiti municipal officials.

Ditoy a natratar no ania ti panagbaliw ti panawen, no ania dagiti epektona iti mula, fisheries, dingo, aglawlaw, kabambantayan ken ekolohia, irigasion, salun-at, transportasion, business community, dagiti rumbeng nga aramiden tapno malapdan daytoy ken ti pannakapaadda iti napagmaymaysa a commitment tapno malabanan ti panagbalbaliw ti panawen.

Kinuna ni Savellano nga awan ti pabasolen iti agtultuloy a pannakadadael ti planeta ken ti agsasaganad a kalamidad ta amin ket adda pasetna iti daytoy.

Iti malem, inwaras ni Savellano ti 13 a carbonizers para kadagiti mannalon iti tunggal ili tapno adda usarenda iti panaglutoda iti taep. Agbalin a kas soil conditioner ti naluto a taep a mausar iti kataltalonan imbes a maibelleng iti karayan a masansan nga ar-aramiden dagiti ricemills.#