Footer

P1-M, naur-or iti konsierto

CANDON CITY – Agdagup iti maysa a milion ti napastrek ti San Juan de Sahagun Parish Church manipud iti konsierto a naangay iti uneg daytoy simbaan-katoliko itoy siudad idi Desiembre 5, 2009 a dagiti nalatak a personalidad dagiti kangrunaan a nagakem ken nagkanta.

Ni House Deputy Speaker Eric Singson ti maysa kadagiti kangrunaan a performer iti nasao a konsierto a pakairamanan da Msgr. Vicente Avila, Fr. Carlito Feria ken Fr. Leobardo Inofinada nga agpapada a padi iti nasao a simbaan. Nagkanta pay da Dr. Ericson Singson, Chef Peter Nic Rodriguez ken dadduma pay nga annak daytoy a siudad.

Napauluan iti “This Is The Moment”, ti konsierto ket maysa a rabii a panangpadayaw kadagiti talentado nga umili daytoy a siudad a pakaibilangan ni Madam Minervina Singson wenno Nana Ambin a dakkel ti kontribusionna iti musika.

Kaaduan kadagiti nakanta iti konsierto ti pinutar daytoy dakkel a babai ni Congressman Singson ken dagiti kolaborasionna kada Abbot Santos Rabang, Fr. Perlito dela Cruz, Jose P. Acance, Elna Balbin, Gene Lopez ken dadduma pay.

Kaddua ni Nana Ambin a nangkompaniar kadagiti klasiko a kankanta da Atty. Richard Carino ken Melissa Taqueban. Ngem kangrunaan a nangpangayed iti programa ti accompaniment ti Philippine Philharmonic Orchestra a kas kada Jorge Joy Sababan iti violin, Crisancti Macazo ti viola, Ernesto delos Reyes iti bass, Patrick Sanchez iti cello ken ni Melvin Lazaro iti violin.

Nakipaset met a performers iti konsierto ti Centennial Choir, St. Joseph Institute Choir, City Officials and Employees Choir, Barkadahan para kay Kristo Choir, ken Candon City Childrens Choir babaen ken ni Cherry Lou Robledo kas conductor.

Nag-perform pay da Kristell Singson, Dino Chua, Joana Marie Cawigan, Regine Garabiles, Jedessa Calacday, Marlon Fernandez, Frances Vitug, Nuriel Sanchez, ken Jameson Andrada ken nagpabuya ti Candon City Percussionists and Dancers, St. Joseph Institute Ballet ken Candon City String Ensemble.

Kinuna ni Congressman Singson a maaramat ti nasao a proceeds para iti pannakapasayaat ti Simbaan-Katoliko idinto nga adda mailasin kadagiti biktima ti bagyo.#

Comments are closed.