Footer

PUSTA NI AYAT (Maudi a paset)

Ania ti kayatmo a sawen, bro?” naperreng ni Dan ni Kolo.

“No mapatinnag ni Ishty ti riknam, libre ti loadna iti tallo a bulan. Ngem no saan, isu met ti mangted iti load ni Carmela,” insungbat ni Kolo.

Linuktan ni Dan ti maysa pay a bote. Nupay saan unay nga aginum iti adu, intanguapna ti beer ket awanen ti naggian ti botelia idi idissona.

“Dika unay, bro. Ammok a nasakit ti nakemmo iti naammuam. Uray siak, diak met magustuan ti inaramid ni Ishty. Isu a dispensarem koma ti panangitedko iti numerom kenkuana,” tinapik ni Kolo ti abaga ti gayyemna.

“Diak impagarup a maaramid ni Ishty ti kasta, bro. Agyamanak ta naammuak a dagus,” medio agngadalen ni Dan.

“Siakon ti dumawat iti dispensa iti madi nga inaramid ti kasinsinko, bro. Kas gayyemmo, diak kayat a lalo pay a mapasakitanka.”

Nadatngan ni Dan da Ishty ken Carmela iti pagtaenganda iti maysa a sumipnget. Kas kadagiti napalabas nga aldaw, nakainum manen ti baro

“Ne, addan ni Dan. Ala agpapatangkayon, annakko, ta innak ituloy tay ub-ubraek iti kosina,” kinuna ni Nana Diling ket naglayonen iti likod.

Napaut nga ulimek ti simmaruno. Kasla poste a naidarekdek ni Dan iti nagtakderanna. Ni Ishty ti immuna a nagtimek.

“Dan, naammuak ti napasamak. Inungtannak ni Kuya Kolo.”

“Apay a naaramidmo ti kastoy kaniak, Ishty? Ammok, saanak a maibagay kenka ngem dika koma nagang-angawan toy riknak,” natangken ti boses ti baro.

“Saan a pudno ti imbaga kenka ni Kolo,” nakadumog a sungbat ni Ishty.

“Saan a pudno? Awan kinapudnona a pinagpinnustaanyo iti load ti panangpatinnagmo kaniak ha, Ishty?”

“Wen, pudno. Idi makitaka iti entablado, nakitak ti kinaseriosom. Insapatak ken ni Carmela a siak ti makapaamo kenka. Ngem iti panagpaut ti panaglangenta, nariknak nga agayatak metten kenka,” insangiten ni Ishty.

“Kinapudnona, manong, saan nga inawat ni Ishty ti bayad ti panangabakna koma iti pusta,” insaruno met ni Carmela.

“Ket ti boyprenmo iti Manila?” adda latta pait iti tono ni Dan.

“Wen, pudno nga adda. Ket isu ti maysa a ginagarak sadiay siudad. Saan a tapno kadennak no di tapno gibusakon ti relasionmi. Nadagsen met ti riknak nga adda pay laeng sabali a karelasionko bayat a data,” timmakder ni Ishty ket inasitganna ni Dan. “Pakawanennnak koma. Ngem ammo ti Dios no kasano ti panagayatko kenka,” immarakup ti balasang.

“Manong, saan a nangngeg ni Mang Kolo ti sibubukel a saritaanmi ken ni Ishty,” kinuna met ni Carmela.

“Ishty, ay-ayatenka unay. Ngem ikkannak koma iti gundawayko nga agpanunot. Nasaktanak unay iti napasamak,” inukas ni Dan ti arakup ni Ishty.

“Dan, I’m so sorry,” insaibbek ni Ishty ngem saanen nga intaltalek ni Dan a nagturongen iti siledna.

ADDA MANEN iti igid ti baybay ti balasang. Duan a lawas a ditoy ti pangpalabsanna iti malem. Buybuyaenna ti ilelennek ti init. Manipud iti daydi naudi a panagpatangda ken ni Dan, saanen a timmawag ti baro kenkuana. Kuna ti inana nga adda daytoy iti Cebu ngem saanna nga ammo no ania ti ginagarana sadiay. Kinitana ti relona. Pasado alas-sais. Sumagmamano pay a minuto, alun-onen manen ti taaw ti init ket sumublat ti sipnget.

Kastoy kadi ti pagbanagan ti ayan-ayatda ken ni Dan? Ayat a nangrugi iti pustaan. Ket imbes nga isu ti mangabak, isu ti naabak.

Mangrugi manen a tumbog dagiti matana idi adda nangpaguni kenkuana.

“Kumustakan, Ishty?” naggapu iti likudanna ti pamiliar a boses. Inin-inayadna ti timmaliaw. Ni Dan nga agpayso. Umis-isem ti baro.

Addan ni Dan iti sangona a mangiyaw-awat iti imana. Inawatna ti dakulap ti baro ket timmakder.

“Kunak no dikan makita, Dan,” nagbanarbar ti boses ti balasang. Limmabas iti agsumbangir a pingpingna dagiti kristal manipud iti matana.

“Idi damo, nasakit unay ti nakemko, isu nga inkeddengko ti umadayo. Inawatko ti diaya ti opisinami nga agatendar iti komperensia sadiay Cebu. Sadiay, naamirisko nga ay-ayatenka iti laksid ti amin,” insungbat ti baro. Inruarna ti panio iti bulsana ket nakadungdungngo a nangpunas kadagiti lua ti balasang.

“Kastaak met kenka, Dan. Pakawanennak koma,” insaibbek ni Ishty.

“Ala, huston. Ti napateg, addaka iti sibayko. Ket diakon ipalubos pay nga aginnadayota, Ishty,” inagkan ni Dan dagiti bibig ni Ishty.

Kasla is-isudan ti tao iti igid ti baybay. Didan inkankano ti panagiinnisem dagiti lumabas a sumagmamano a mangngalap. Kagiddan ti ilelennek ti init, nakataltalinaayen a kas iti baybay ti rikna dagiti dua.#