Footer

BANNER NEWS: Medical missions, isayangkat ti ISAH iti I. Sur, I. Norte, Dis. 17-23

VIGAN CITY – Nalawlawa ti sakupen ti medical mission nga angayen ti Ilocos Sur Association of Hawaii (ISAH) ita a tawen, daytoy ti impakaammo ni dati a Representative Felipe “Jun” Abinsay itay lawasna.

“Medio dakkel…” kinuna ni Abinsay bayat ti interbio kenkuana ni Jun Ramos, host ti programa a Barangay Commando Brigada, sana innayon a malaksid ti medical mission nga angayenda iti Ilocos Sur ken iti Ilocos Norte, isayangkat pay ti ISAH ti maysa a medical mission iti Parañaque ken bisitaenda ti proyektoda iti Gawad Kalinga iti Mandaluyong City.

Kinuna ti dati a representative a 40-50 ti kadagupan dagiti kameng ti delegasion a pakaibilangan dagiti doktor, narses, volunteers ken dagiti opisial ti ISAH nga agpa-Ilokos para iti medical mission nga isaysayangkat ti gungloda iti tunggal maikadua a tawen.

Maangay ti maysa a welcome reception para kadagiti sumangpet a kamkameng ti delegasion iti rabii ti Disiembre 16 iti Crisologo Street.

Kalpasanna, isayangkat ti ISAH ti medical missions iti Cabugao (Disiembre 17), Sinait (Disiembre 18), Vigan City (Disiembre 19), iti Pasuquin ken Pagudpud iti Ilocos Norte (Disiembre 21, iti Santa, Ilocos Sur (Disiembre 22) ken Santiago (Disiembre 23).

Malaksid ti medical mission iti Sinait, maangay ti maysa a pasken a pakapadayawan da Mrs. ISAH 2008-2010 Davelyn Ancheta Quijano (Sinait), 1st runner up Anna Lisa Mateo (Cabugao) ken 2nd runner up Loida Alimboyoguen Yamamoto (Vigan). Adda espesial a partisipasion dagitoy iti medical missions babaen ti panagserbida a boluntario kadagiti kailianda iti tay-ak ti salun-at.

Iti Vigan City, maangay iti malem kalpasan ti medical mission dagiti pasalip a pakaibilangan ti Singing Idol.

Kinuna ni Abinsay nga adda posibilidadna a maawis dagiti mangabak iti Singing Idol kadagiti angayen ti ISAH a pasken ditoy pagilian ken iti Hawaii.

Innayonna nga addanto pay iwarasda a sagut babaen ti Caritas Nueva Segovia kadagiti biktima ti napalabas a bagyo.

Daytoy ti maikatlo a daras a mangisayangkat ti ISAH iti medical mission ditoy probinsia ken iti Ilocos Norte, immuna idi 2005, sa idi 2007.

Dagiti participating unit organizations a kameng ti ISAH: Annak ti Sinait iti Hawaii, Sinait National High School Alumni Association of Hawaii, Cabugao Sons & Daughters Association of Hawaii, Vigan Association of Hawaii, Santanians of Hawaii-USA, ken Santegenians of Hawaii.#