Footer

Biomass Power Plant: Otoridad a sumrek iti katulagan, inted ti Konseho ti Vigan City ken ni Mayor Eva

VIGAN CITY – Kinuna ti bise mayor ditoy siudad nga inikkanen ti sangguniang panlungsod ti mayor iti otoridad a sumrek iti katulagan iti maysa a kompania ti ekolohia mainaig iti pannakaipasdek ti biomass power plant iti siudad.

Kinuna ni Vice Mayor Franz Ranches a nangipasa ti sangguniang panlungsod iti resolusion a mangited ken ni Mayor Eva Marie S. Medina iti otoridad a sumrek iti katulagan iti Pacific Ecology mainaig iti pannakabangon ti maysa a planta babaen ti build-operate-transfer scheme.

Iti feasibility study nga insayangkat ti Pacific Ecology mainaig iti maipasdek a biomass power plant, viable ti nasao a proyekto a manamnama a mangpataud iti nalaklaka a koriente para kadagiti agnaed ditoy siudad.

Iti babaen ti BOT scheme, ipatakder ti Pacific Ecology ti planta nga awan ti gastuen ti city government, patarayenna ti nasao a planta iti mapagtutulagan a tawen a kapautna santo maipaima iti gobierno ti siudad ditoy.

Kinuna ni Ranches a maysa laeng nga addang ti pannakaited iti mayora ti otoridad a sumrek iti katulagan iti Pacific Ecology iti nawatiwat a proseso para iti pannakaipasdek ti biomass power plant.

Innayon ni Ranches a maidatagto pay ti katulagan iti National Economic Development Authority para iti pannakaadalna.

Inyunay-unay ni Ranches a nupay awan ti magasto ti city government iti pannakaipatakder ti nasao a planta, responsibilidadna ti pannakaited iti lote a pakaipatakderan ti planta ken iti assurance ti pannakapaadda dagiti raw materials a kasapulan ti planta para iti operasionna.

Kinuna ti bise mayor a no maipasdek ti biomass power plant ditoy siudad, manamnama ti nalaklaka nga elektrisidad para kadagiti agindeg iti Vigan City ken kaparangetna nga il-ili.#