Footer

Ambassador, nagidonar iti computer sets, wheelchairs

CANDON CITY – Duapulo a computer units ken 20 a wheelchairs ti inyawat ti pangulo ti Taipei Economic and Cultural Office (TECO) in the Philippines bayat ti ibibisitana ken ti delegasionna ditoy a siudad idi Enero 8.

Inyawat ni Ambassador Donald C. T. Lee, hepe ti TECO, dagiti wheel chairs ken computer units kada House Deputy Speaker Eric Singson, Candon City Mayor Allen Singson ken inimatangan dagiti city officials ken dadaulo dagiti nadumaduma nga ahensia ti gobierno ditoy siudad.

Mausar dagiti computer units iti e-learning Center a naipasdek itoy a siudad idinto a mausar met iti ospital ti siudad dagiti wheelchairs.

Kinuna ni Deputy Speaker Eric Singson a malaksid kadagiti naiyawat, esponsoran pay ti opisina ti TECO ti pannakaipaay ti libre a training iti panag-assemble iti computer kadagiti taga-Candon.

“Babaen itoy tulong nga impaay ti TECO, maital-o ti edukasion ken makatulong iti pannakapaadda iti pagsapulan iti siudad. Sapay koma ta agtultuloy daytoy a partnershiptayo iti TECO,” kinuna ti diputado.

Iti met panagsarita ni Ambassador Lee, kinunana a bassit laeng daytoy a pagsubadna iti adu a naitulong ni Deputy Speaker Singson bayat ti kaaddana ditoy pagilian manipud pay idi 2008.

“Sapay koma ta makatulong dagiti computers iti e-learning ken communicative skills dagiti taga-Candon City ken dagitoy wheelchair para iti nasaysayaat a panagbiag ken mobility dagiti addaan rangkap,” kinuna ni Lee.

Saan a daytoy ti umuna a gundaway a nangipaay ni Dee iti tulong iti siudad ti Candon.

Maipalagip a babaen ti maysa a resolusion nga inaprobaran ti city council ditoy, naideklara kas adopted son ti siudad ti ambassador kagiddan ti pannakaiselebrar ti Feria de Candon idi 2008.#