Footer

EDITORIAL: Masapul ti naing-inget a pannakaipakat ti gun ban

Apagtapog pay laeng ti 2010 ngem nagsasarunon dagiti insidente ditoy probinsia a nakaaramatan ti paltog.

Taldiapantayo dagiti sumaganad:

Idi Enero 3, iti Sto. Domingo, maysa a lalaki ti napaltogan gapu iti kantiaw. Segun iti report, pinakamatan ti suspetsa iti paltog ti grupo ti biktima gapu iti panangkantiaw dagitoy kadakuada nga agitultulod iti nadadael a motorsiklo ket napuntaan ti biktima.

Idi Enero 6, iti Santa Maria, ginudas dagiti nakamotorsiklo a lallaki ti dati a barangay captain ti Cabaroan ken kandidato para konsehal iti daytoy nga ili.

Idi Enero 7, pinaltogan ti dua a lalaki a nakalugan iti motorsiklo ti maysa nga anchorman ti maysa a lokal a radio station ket no saan a nakapagpaarayat, posible nga inuloyanda.

Napaltogan ti maysa a mangngalap iti Barangay Salapasap, Cabugao idinto nga inuloyan dagiti lallaki a naglugan iti motorsiklo ti maysa a lalaki a taga-Abra a mapan makisinnarak iti gayyemna a babai iti Sinait.

Iti Santiago, napaltogan ti maysa nga aglaklako iti nateng gapu laeng iti panangisemna iti suspetsa. Sabali laeng ti kaso ti pammaltog a naisayangkat iti Santa Cruz a nakatayan ti maysa a mekaniko.

Mainayon ditoy dagiti kaso ti panagpaputok iti paltog iti sumagmamano nga ili ditoy probinsia.

Dagitoy a pammaltog ti pammaneknek nga adu dagiti aglemlemmeng nga armas nga adda iti ima dagiti saan a rumbeng nga agikut iti armas a tattao ditoy probinsia.

Pammaneknek pay dagitoy a pammaltog ti saan a panangitaltalek dagitoy a tattao iti kampania ti kapolisan a maisuko dagiti kolurum a paltog ken mairehistro dagiti nagpason ti lisensiada nga armas ken ti awan a panangipirpiritda iti gun ban nga impaulog ti Commission on Elections.

Makapariribuk iti panunot dagiti mapaspasamak a pammaltog nangruna ket masungad ti eleksion. Ad-adda pay a makapariribuk ti kasla awan a panagbuteng iti linteg ken kadagiti otoridad dagiti nagisayangkat kadagitoy a pammaltog.

Idagadagmi ngarud ti naing-inget a panagiwayat dagiti polis iti panagpatroliada kadagiti masakupanda nangruna iti rabii, ti pannakaipakat iti checkpoint tapno masiputan dagiti rummuar ken sumrek iti hurisdiksionda, ti pannakaipakat iti raid wenno search operations kadagiti pagtaengan a masuspetsa a pakaiduldulinan dagiti paltog ken police visibility tapno agpangadua dagiti rinuker ti pampanunotda a mangiwayat iti dakes a panggepda. Kasta met a mapilaan a dagus iti kaso dagiti naglabsing tapno maisaklangda iti korte.

Kasapulan nga ipakat ti kapolisan ti ngipen ti linteg uray no asino dagiti naglabsing, aniaman ti kinataoda, uray no dakkel ti natugawanda iti gimong wenno turay. Political will a kunada.

Tumulong koma met ti komunidad iti kapolisan babaen ti panangireportda dagiti masiputanda nga aglabsing iti gun ban.

Agingga nga agraira dagiti paltog, pagduaduaan ti pannakaiwayat ti natalna ken nadalus nga eleksion agsipud ta posible a maaramat dagiti paltog iti pammutbuteng, panagsuitik ken pammapatay.#

Comments are closed.