Footer

Mayor Eva, city officials, agsala iti hula iti Balikatan-Agriculture Day

VIGAN CITY- Maysa a mapadpadaanan a mabuya iti panagpiesta ti Vigan City ti panagsala iti hula da Mayor Eva Marie S. Medina ken dagiti city officials ditoy.

Iti interbio ti DWRS kenkuana, kinuna ni Mayor Eva Marie S. Medina a Hawaiian ti motif iti Balikatan-Agriculture Day inton Enero 23, ket agkawes iti nasabsabongan amin a partisipante a pakairamanan dagiti mannalon, mangngalap, Rural Improvement Club ken Balikatan.

Segun iti mayora, maangay ti parada iti bigat ket iti karabianna ti pannakakorona ti Miss Vigan.

“Napagnunumuanmi a dagiti farmer presidents, CAFC, technician, ken city officials agsalada iti Hawaiian intermission number,” impalgak ni Medina.

Ti hula ti nakaugalian a sala dagiti Hawayana nga ipabuyada no adda pasken wenno napateg a sangaili a dumap-aw iti lugarda.

Sabali pay a manamnama a pagdudupudopan dagiti tattao a buyaen ti Longganisa streetdancing competition a maangay inton Enero 22.

Kas iti kallabes, dadakkel ti premio nga agur-uray iti agkampeon iti nasao a streetdancing competition a mangitampok iti longganisa, ti nalatak a produkto daytoy a siudad.

Impakaammo ni Medina a maangay iti daytoy nga aldaw ti skills competition a pakabuyaan iti proseso ti panagaramid iti longganisa manipud iti pannakarangrangkay dagiti baboy, pananggiling iti karne, panagiwa-iwa, panagselsel, panaggalut ken panagluto.

“Ag-team-up ti 3-4 a matadero ken dua nga aglonglongganisa.” kinuna ni Medina.

“Makitatayo no kasano kasiglat dagiti mataderos ken dagiti aglonglongganisa,” kinuna ti mayora.

Dagiti nagturpos iti Los Mataderos, pagadalan dagiti agbalin a partidor, ken dagiti addaan permit nga agar-aramid iti longganisa dagiti makisalip iti skills competition.

Kinuna ni Medina a maangay ti showdown ti streetdancing iti karabianna a pannakakorona metten ti Miss Infantile King and Queen.

Dagiti sumaganad dagiti aktibidad iti panangselebrar ti Vigan City iti konbersion ni San Pablo: Jan. 19 – DZNS Radio Night, Jan. 20 – Gay Pride Night, Jan. 21 – Education Day, Jan 22 – Social Services ken NGO Day, Jan.23 – Balikatan-Agriculture Day, Jan. 24 – SK Day, Jan. 25 – Vigan City Day, Jan.26 – DWRS Commando Radio Day.

Kinuna ni Medina a dagiti Bigueño a nagballigi iti karerada ken agtaktakem iti nangato a puesto dagiti inawisda a kangrunaan a sangaili dagiti nadumaduma nga aktibidad iti panagpiesta ti Vigan a paka-iramanan da Dr. Socorro Pilor, director iti IMC; Engr. Marino Alquiza, DPWH regional director; ken Police Chief Supt. Constante Azares, PNP regional director.#

Comments are closed.