Footer

P100-M pategna a mula a marihuana, pinag-ot, pinuoran dagiti polis

CAMP ELPIDIO QUIRINO, Bantay, Ilocos Sur – Nasurok a P100 milion ti pategna a mula a marihuana ti pinarut ken pinuoran ti nagtipon a bunggoy ti Philippine Drug Enforcement Agency ken polis ditoy probinsia iti insayangkatda a panagraut iti plantasion daytoy maiparparit a mula iti dua a sitio iti Sugpon, Ilocos Sur itay nabiit.

Iti report manipud iti provincial police office, kinuna ni Provincial Police Director Senior Supt. Eduardo Dopale nga insayangkat ti nagtipon a team ti PDEA, Police Provincial Office, Police Anti-Illegal Drugs Special Operations Task Group (PAIDSOTG), ken ti Ilocos Sur Provincial Public Safety Management Company ti nasao a panagraut iti tallo a plantasion ti marihuana nga aglawa iti 6.2 ektaria iti sitio ti Nagawa ken Naba, Barangay Caoayan, Sugpon, Ilocos Sur.

Kinuna ni Dopale a pinarut dagiti rimmaut ti aganay 120,000 a dadakkelen a mula a marihuana ken 2,000 a bunubon a mapattapatta nga agbalor iti nasurok a P24 milion iti immuna a plantasion, agarup 384,000 a fully grown a mula a marihuana ken bunubon a mapattapatta nga agpateg iti P76 milion iti maikadua ken maikatlo a plantasion.

Pinuoran dagiti polis ti kaaduan dagiti napag-ot a mula a marihuana ket nangipababada laeng iti sumagmamano kareppet a kas ebidensia.

Nupay kasta, awan ti naaresto dagiti rimmaut a polis a mangtartaraken kadagiti mula a marihuana.

Iti napalabas, nangisayangkat dagiti pannakabagi ti linteg kadagiti panagraut kadagiti plantasion ti marihuana iti nagbeddengan ti Ilocos Sur, Benguet ken La Union a nangpag-otan ken nangpuoranda kadagitoy maiparparit a mula.#