Footer

SALAYSAY: Vigan City: Siudad iti Daan a Siudad

NO SANGSANGAILIKA iti Siudad ti Vigan, ti kabesera ti probinsia ti Ilocos Sur ken maaw-awagan pay iti Intramuros iti Amianan ken Siudad Fernandina, panagriknam, naipalaiska iti daan a panawen, iti maysa a paset ti pakasaritaan idi dagiti Kastila ti agturay ti Pilipinas. Ngamin iti baet ti progreso ti Vigan kas paneknekan ti panagbalinna a tourist destination iti Amianan, nakatakder pay laeng iti Kalsada Mena Crisologo dagiti dadakkel a pagtaengan a nagatep iti tiha, addaan iti napuskol a ladrilio a diding ken kulintipay a tawa. Maawaganen daytoy a paset ti Vigan iti Heritage Village agsipud ta nailistan daytoy iti UNESCO a sanikua ti sangalubongan. Iti panagbalinna a heritage city, pagrebbengan ti internasional a komunidad a salakniban ken preserbaen daytoy uray iti panawen ti gubat.

Nagtaud ti nagan a Vigan manipud iti biga, maysa a kita ti mula nga agtubtubo idi iti igid ti karayan Mestizo. Segun dagiti autoridad iti historia ti Vigan, maysa nga isla daytoy a disso a pagisangsangladan dagiti komersiante kadagiti imaroda a tagilakoda.

Ngarud, uray idi sakbay nga immay dagiti Kastila, narang-ayen a sentro ti komersio ti Vigan. Nagindeg ditoy dagiti komersiante nga Intsik ket nagassawada ken naaddaanda iti pamilia. Kaadduanna kadagiti nadaeg a pagtaengan ti Vigan iti paset a maaw-awagan itan ti Vigan Heritage Village ti pinatakder dagiti nabaknang nga Intsik. Kaintsikan idi ti awag daytoy a paset ti ili.

Ti Vigan ti maikatlo a kalakayan a siudad iti Pilipinas. Nasurok nga uppat a gasut ken tallupulo a tawen ti napalabas, binangon ni Juan de Salcedo, apo ni Miguel Lopez de Legaspi ken nangipasdek iti Manila, daytoy a disso kas Siudad Fernandina kas pammadayaw ken mi Ari Fernando ti Espania, ti anak ni Felipe II a nakainaganan ti Pilipinas. Pinagbalin pay ni Lopez de Legaspi ni Salcedo nga encomiendero ti Vigan ken Lieutenant General iti probinsia ti Ilocos nga idi a panawen binukel ti Ilocos Norte, Ilocos Sur , Abra, La Union ken paset ti Mountain Province.

Iti panagbalin ti Vigan a tugaw ti politika, ekonomia ken eklesiastika iti Amianan a Luzon, saan ngarud a nakakaskasdaaw a nagdudupudop ditoy dagiti dadakkel a pagtagilakuan, paglinglingayan, pagadalan ken pagtaengan.

Iti panagindeg dagiti Kastila ditoy, naalian dagiti umili kadagiti pammatida, nakaugalian ken sistema ti edukasion.

Ti relihion ti maysa kadagiti kangrunaan a nabati dagiti Kastila iti Vigan. Napeklan a katoliko dagiti agnaed ditoy nupay adu metten dagiti relihion a naipasdek kas iti Iglesia ni Kristo, Iglesia Independiente, Saksi ni Jehovah ken dadduma pay.

Masarakan ti Arsobispado wenno residensia ti Arsobispo ti Nueva Segovia iti amiananen ti Simbaan ni San Pablo.

Idi Setiembre 7, 1758, naiyalis ti dioses ti Nueva Segovia manipud iti Lallo, Cagayan iti Ciudad Fernandina de Vigan ket daytoy ti kangrunaan a tulbek tapno mabigbig daytoy a kas siudad. Naibasar daytoy iti bileg ti royal decree nga impaulog ni Ari Fernando VI ti Espania.

(Adda tuloyna)

Comments are closed.