Footer

BANNER NEWS: House Deputy Speaker Eric Singson, idauluanna dagiti mapadayawan iti Fr. Jose Burgos Awards

CANDON CITY – Idauluan ni House Deputy Speaker Eric Singson dagiti padayawan ti gobierno probinsial ti Ilocos Sur iti Fr. Jose Burgos  Achievement Awards iti pannakaselebrar ti Maikatlo a Kannawidan Ylocos Festival.

Napili ni Singson a pakaipaayan ti nasao a pammadayaw gapu iti adu a gapuananna iti benneg ti public service manipud panagmayorna iti Candon idi 1972 iti tawenna a 23.

Karaman kadagiti kangrunaan a naaramidanna iti Kongreso ti panagbalin ti ili ti Candon a maysa a component city, ti RA 09340 a mangiyatiddog iti termino dagiti barangay officials, RA 09337 wenno EVAT Law,  linteg a namagbalin ti Ilocos Sur Agricultural College nga Ilocos Sur Polytechnic State College, ti pannakairaman ti Candon Community College iti University of Northern Philippines ken dadduma pay. Kangrunaan a sentro ti adbokasiana ti pannakapasayaat ti industria ti tabako, edukasion, inprastruktura ken salun-at.

Kadua ni Singson a mapadayawan inton rabii ti Enero 31 da Archbishop Ernesto Salgado, arsobispo ti Nueva Segovia, para iti rehihion; Dr. Fortunato Battad, President Emeritus ti Central Luzon State University ken Dr. Dorotea Filart, dati a Presidente ti University of Northern Philippines iti benneg ti akademia; Architect Reymundo Florentino, maysa a mabigbig a teddek iti pannakapreserba dagiti daan a pasdek iti siudad ti Vigan ken immawat iti prestihioso a Golden Delphic Award iti 2nd International Delphic Games in Architectural Conservation Category sadiay Malaysia idi 2005 para iti photographic documentation ti Vigan Architectural Heritage iti benneg ti arkitektura, WBA Superflyweight champion Brian Viloria iti sports; Viva Entertainment big boss Vic del Rosario Jr. para iti entertainment; Gawad SAKA Outstanding Corn Farmer Maximo Rabanal ken Gawad SAKA Outstanding Young Farmer Romeo Yapit iti agrikultura.

Maipaay met ti Fr. Jose Burgos Special Award ken ni Mancielito Tacadena, reporter ti NBN Vigan ken mannurat iti Bannawag gapu iti gapuananna iti benneg ken print journalism. Napili ti sinuratna kas Best Agriculture Story iti 2nd Bright Leaf Agriculture Journalism Awards idi 2008.

Maipaay ti isu met laeng a pammadayaw iti Ilocos Sur Medical Society gapu iti agduduma a programana a nakatulong kadagiti nakurapay a pamilia iti probinsia ken aktibo a partisipasion daytoy idi kangitingit ti Bagyo Pepeng ken ti grupo dagiti mangngalap iti Sito Nagtupakan, Pudoc Sur, San Vicente a nangispal iti biag ti 12 a tattao a naiwawa iti taaw idi 2008. Inawat payen ti grupo ti Gawad Kalasag Award manipud iti National Disaster and Coordinating Council itay napan a tawen.

Ti Fr. Jose Burgos  Achievement Award ti kangatuan a pammadayaw nga ipaay ti probinsia kadagiti taga-Ilocos Sur a nakaaramid iti naisangsangayan ken nakaited iti dayaw para iti probinsia iti sangkapagilian ken ballasiw-taaw. #

Comments are closed.