Footer

EDITORIAL: Pagbutnganda ken ni Estrada?

Itay nabiit, imbasura ti Commission on Elections ti kaso ti diskualipikasion a tumaray iti kinapresidente maikontra ken ni dati a Presidente Joseph Estrada.

Kinuna ti Comelec a saan a maiyaplikar ken ni Estrada ti probiso ti konstitusion maikontra kadagiti dati a presidente nga agtarigagay iti reeleksion.

Segun iti Comelec, kayat a sawen ti “reeleksion” ket panagtaray manen iti isu met laeng a posision kas iti agdama a tugtugawanna ken/wenno ok-okuparanna.

Iti nalawlawag a pannao, saan a maiyaplikar ken ni Estrada ti nasao a probiso agsipud ta saan met a nakatugaw a presidente. Nupay nagpresidente ni Estrada, dina nakumpleto ti takemna agsipud ta napadisi iti puestona gapu iti Edsa revolution II.

Kinuna pay ti Comelec a saan a maibilang a nuisance candidate ni Estrada agsipud ta ikutna amin dagiti kualipikasion ti maysa a kandidato para presidente, addaan iti partido ken suporta dagiti tattao.

Ken ni Estrada, “signipikante” daytoy a desision ti Comelec agsipud ta naiyetnag daytoy idi Enero 20, eksakto a siam a tawen manipud idi napadisi iti puestona gapu iti Edsa revolution.

Madakamat ditoy nga idi Enero 20, 2001, kapilitan nga immulog ni Estrada iti puestona iti Malakaniang gapu iti panagdudupudop dagiti tattao a nagrali ken nagprotesta iti Edsa gapu iti saan a panangipalubos dagiti senador a kaaliadona ti pannakalukat ti enbelop a mapapati a nakaipalaonan ti bank account ni Estrada iti nagan ni Jose Velarde. Gapu iti daytoy, nag-walkout dagiti senador a kameng ti oposision ket daytoy metten ti nangsindi iti irarasuk ti timek dagiti tattao a nagtungpal iti yuulog ni Estrada iti puestona.

Uray ita, ipetpetteng ni Estrada a natakaw ti kinapresidente kenkuana ket ita agkandidato tapno “agserbi manen kadagiti tattao” ken “ituloy ti administrasionna ti nairugina idi 1998”.

Kas ninamnama, nagrag-o dagiti kaaliado ni Estrada ket imbandoda a babaen daytoy a desision, mapukaw aminen a panagduadua ken kuestion mainaig iti eligibility ti nalatak nga aktor nga agkandidato manen iti kinapresidente.

Ita pay, kinuna ti maysa a liderna a babaen daytoy a desision, tumayok ti rating ni Estrada ket kumamakam kadagiti frontliners iti kinapresidente.

Ngem saan pay a nalpas, segun kadagiti saan a mapnek iti desision ti Comelec.

Nupay kinuna ti Malakaniang a respetarenna ti desision ti Comelec a mangipalubos ken ni Estrada nga agtaray iti kinapresidente iti May 2010 elections, patien ti sumagmamano nga opisial ti administrasion nga iti pannakaibasura ti isyo ti diskualipikasion iti Comelec, agtaray la ketdi dagiti nagpetision iti Korte Suprema para iti pinal a desision no eligible ni Estrada nga agtaray para presidente.

Idagadagmi a bay-an lattan dagiti kontra nga agtaray daytoy a para presidente. Apay a kabutengda ni Estrada?

Husto ti Comelec idi kunana nga iti udi, dagiti umili a Filipino ti mangdesidir no pagtugawenda manen ni Estrada kas presidente.

Wen, bay-antayo lattan nga agtaray ni Estrada. Bay-antayon a dagiti kailiantayo ti mangikeddeng no kayatda pay nga agbalin a presidente iti baet dagiti rimmuar nga alingasaw bayat ti naiyababa a panagtakemna.

Ditoy ti pakapaneknekan no talaga a natangkenan dagiti botante ditoy pagilian.#

Comments are closed.