Footer

INDAYON NI LAGIP: Makapagsakripisio ni Ayat (Tuloyna)

Nupay kastoy ti kinarigat ti panagbiagmi, nagan-anusak, Manong Danny. Ammok nga igagaed ni Tatang ti agsapul iti pagbiagmi, ngem agsipud ta makitaltalon laeng, dandani di pay umdas ti maapitna a para kadakami. Taga-ili ti akinkukua iti taltalonen ni tatang. Nadamagko a nabayagen a balo daytoy ken awan ti anakda.

Idi damo, saan a nangato ti arapaapko iti biag. Simple laeng a panagbiag ti kalikagumko.Gapuna a maysa met a marigrigat ti kaayan-ayatko, ni Marlon. Awan pagkunaak ken ni Marlon. Nasingpet ken nagaget. Adda met buyana. Kinapudnona, adu dagiti mangpalpallilit kenkuana a kalugaranmi a babbalasang. Nagasatak ta siak ti inaremna.

No awan ti trabahona iti talon, nakaditoy balay ni Marlon. Tumulong ken ni tatang nga agalad wenno agmula iti nateng. Gapuna a sangkadayaw ni tatang ni Marlon.

“Panagkitak, agbalinto a nasayaat nga asawa ni Marlon,” sangkakunana kaniak.

“Agurnong pay iti pagkasarmi, ‘tang,” nakunak. “Kayatko a no agsimpakamin, addan uray bassit a balay nga ulianmi.”

“Nasayaat dayta a planom. Mabalinyo ti agpatakder iti abay ditoy balay. Nalawa pay laeng.

“Kayatko a bukodmi a solar, tang.”

Nagmurareg ni tatang. “No kayatyo ti maaddaan iti solar, mabayag pay ngarud sakay agsimpa.”

Ngem dayta ti impakaunak ken ni Marlon. Masapul nga agbalinkami nga independiente apaman nga agsimpakami. Daytay saankamin nga agdepdepende kadagiti nagannak kadakami.

Ngem makitak nga uray kasano ti panangirarem ni Marlon iti bagina iti talon, narigat a matungpal ti arapaapko… ti arapaapmi a dua.

Nagsasaruno ngamin dagiti bagyo a nangdalapus iti lugarmi. Dagidi nagbabagas ti dawada a pagay, nalemmesda iti layus. Inlupeklupek ti bagyo ti arapaapmi.

“Baliwak ti bumangon,” nakuna ni Marlon.

Namrayak laeng ti nagtung-ed. Ngem iti kaunggak, kaanonto a makaruk-at datao iti kapitakan?

Iti naminsan nga isasarungkarna, nakunak kenkuana: “Dika kad’ umapal kada Danny, Marlon? Kitaem, manipud nakapan nagtrabaho iti abrod, immasenson ti biagda. Daydi kalapawda, nagsukaten iti bungalo. Kumpleton ti alikamenda.”

“Mabalinko met ti agrang-ay ditoy babaen ti ling-etko,” nakuna ni Marlon.

“Ngem kaanonto? Inton puraw ti wak?”

“Ammom met nga awan ti gastuek para iti pasaporte ken mangilakad nga ahensia.”

“No awan tured pakinakem, awan ti panagrang-ay,” nakunak.  “Panunotem koma ti agbalin a masakbayanta no aggianka ditoy. Awanto a pulos ti asensota.”

“Makaanusak ditoy… ti napateg ket agdennata.”

Iti dayta a nangegko, kinusilapak ni Marlon saak nagwagteng nga immuli iti balay. Napanak nagpupok iti bassit a kuartok. Uray idi agpakada ni Marlon, saannakon a rimmuar.

(Adda tuloyna)

Comments are closed.