Footer

Longganisa Street Dancing Festival, inarak dagiti tattao

VIGAN CITY- Rineprep a tattao a pakaibilangan dagiti naruay a sangsangaili ken turista ti naglilinia iti igid ti kalsada ditoy siudad iti malem ti Enero 22 tapno imatanganda ti Longganisa Festival, tampok a pabuya iti selebrasion ti panagsiudad ti Vigan.

Alas dos pay la iti malem, nangrugin a nagdudupudop dagiti tattao tapno makapuestoda iti lugar a nawaywayada nga agbuya iti umuna a paset daytoy nalataken nga streetdancing competition a nagbalinen a tampok a pabuya iti selebrasion ti panagsiudad ti Vigan.

Iti karabianna a naangay ti showdown dagiti makisalip iti Plaza Burgos kalpasan ti koronasion. Madama pay ti showdown idi mapan iti imprenta daytoy pagiwarnak.

Kabayatanna, iti interbio ken ni Mayor Eva Marie S. Medina, kinunana a maysa pay nga aktibidad a mangitampok iti longganisa ti Extreme Longganisa Challenge Skills Olympics a naangay iti sanguanan ti city hall iti alas nuebe iti aldaw ti Enero 22 a nagsasalipan dagiti uppat a team a binukel ti dua a matadero ken dua nga agar-aramid iti longganisa a nangipakitaanda iti proseso ti pannakaaramid daytoy a produkto manipud iti pannakarangrangkay dagiti baboy, panagiwa, pananggiling iti karne, panagselsel, ken panaggalut.

Dua a kategoria ti napagsasalipan: ti kaatiddogan ti malpas a longganisa iti las-ud ti dua oras ken ti makaaramid iti kaimasan iti raman a longganisa.

Nupay narukod a 78.69 m. ti kaatiddog ti nalpas ti Team 3 idinto a 76.08 ti kaatiddog ti naaramid ti Team 2, agadayo ti nagbaetan dagiti galut iti immuna isu nga inkeddeng dagiti naghurado nga agtablada.

Immawat dagiti nagkampeon iti sag-P4,500; P3,000 ti maikatlo; P2,000 iti maikapat.

Segun ken ni Medina, maysa a nagbaliwan ti street dancing competition ti panagbalinnan a maymaysa ti tokar a kumpasan dagiti makisalip ken naisentro ti pasalip kas panagdayaw ken ni San Pablo, patron daytoy siudad.

Iti Enero 25 ti panangselebrar daytoy a siudad ti Konbersion ni San Pablo, maysa idi a Romano a soldado a nangpakpaksiat kadagiti katoliko sakbay nga inarakupna ti relihion dagitoy.#

Comments are closed.