Footer

Subsistence allowance dagiti balud ingngato ti provincial board

VIGAN CITY- Nagtignay ti sangguniang panlalawigan a tumulong kadagiti balud ditoy probinsia kalpasan ti pannakatakuat ti kinababa ti inaldaw a subsistence allowance dagitoy no maikumpara iti aw-awaten dagiti padada a balud kadagiti sabali a probinsia.

Iti umuna a sessionda idi Enero 5, inaprobaran ti sangguniang panlalawigan ti maysa a resolusion a mangingato iti inaldaw a subsistence allowance dagiti balud iti provincial jail tapno makipatas iti aw-awaten dagiti padada a balud kadagiti kaparangetna a probinsia.

Napagbalin ti subsistence  allowance dagiti balud iti P60 manipud iti P30 kada aldaw.

Indagadag ni Vice Governor Jerry Singson iti provincial board ti pannakaaramid ti nasao a resolusion kalpasan a naduktalanna ti kinababa ti subsistence allowance dagiti balud idi nagpasiar ti grupo dagiti Knights of Rizal iti provincial jail tapno papaskuaanda dagitoy.

“Nakaay-ay-ay ta naammuantayo a P30 ti subsistence allowance dagiti balud (iti provincial jail) idinto a P70 iti Ilocos Norte, P70 iti La Union ken P70 iti Pangasinan,” kinuna ni Singson bayat ti programana a “JCS Kakibin ti Balligi” a naipatangatang iti DWRS itay nabiit.

Kinuna ni Singson nga inlungalongna daytoy “for humanitarian reason” agsipud ta “nakakaasi met piman” dagiti balud iti kinababa ti aw-awatenda a subsistence allowance idinto a ti Ilocos Sur ti maysa a kaunaan a nagbalin a first class a probinsia ket “adda kabaelanna nangruna iti pinansial.”

Innayon ni Singson  a saan met nga umadayo ti provincial jail no maikumpara kadagiti sabali a pagbaludan ta napintas ti pannakamanehar ti pagbaludan ngem adu a rigat ni Provincial Warden Floro Martinez a mangiyan-anay ti subsistence allowance dagiti balud.

Kinuna ni bise gobernador a ti pagbaludan ket maysa a lugar a “pagpampanunotan”, pakaalaanda (dagiti balud) iti naan-anay a panagbabawi ken panangtuntonda iti bileg ti pammati iti Dios ket “dapat laeng nga ikkantayo ida iti namnama ken pagimbaganda bareng inton rummuardan ket nagbalbaliwda metten.”

Sabali pay a pagkurangan a napaliiw ti bise gobernador ti kaawan ti lugan ti provincial jail a pangibiahe kadagiti balud iti pannakabista ti kasoda.

Kinuna ni Singson a mailatang ti pondo para iti subsistence allowance dagiti balud babaen ti maysa a supplemental budget agsipud ta nalpas metten ti budget para iti 2010.#

Comments are closed.