Footer

BANNER NEWS: NIA administrator: 86% ti naileppasen iti Banaoang Irrigation Pump Project

BANTAY, Ilocos Sur – Nairingpasen ti aganay 86.42% iti maar-aramid a Banaoang Pump Irrigation Project, daytoy ti inrakurak ti administrador ti National Irrigation Administration itay nabiit.

Kinuna ni Engr. Carlos Salazar, NIA Administrator, a no malpas, umabot iti 6,312 nga ektaria a kataltalonan ti mapasayakanna a kataltalonan a manamnama a mangingato iti produksion ti pagay a pakabenepisiaran ti 5,334 a pamilia iti walo nga ili iti umuna a distrito ti Ilocos Sur a pakaibilangan ti Vigan, Bantay, Sta. Catalina, Caoayan, San Vicente, San Ildefonso, Sto. Domingo ken Magsingal.

Kinuna ni Salazar a nausardan ti P2.175 a bilion wenno 87.56% ti pakabuklan a pondo ti BPIP a P2.488 bilion idinto nga inannugotna a medio naladawdan iti target a pannakairingpas ti proyekto.

Binisita ni Pres. Gloria Macapagal Arroyo daytoy proyekto ti padanum idi Enero 27.

Kadua ni Arroyo a nagbisita iti pumping station ti BPIP da Ilocos Sur Gov. Deogracias Victor Savellano, First District Cong. Ronald Singson, Deputy National Security Adviser Luis “Chavit” Singson, NIA Administrator Carlos Salazar ken Bantay Mayor Samuel Parilla.

Ti proyekto a narugian idi Marso 2003 ket babaen ti panangilungalong ni sigud a diputado Salaknib Baterina.

Ti proyekto ket addaan iti agarup 1.2 kms. a tunnel, 22 kms. a service main canal, 46 kms. a lateral canal, 170 kms. a drainage, 310 kms. a ditch ken 870 kms. a service roads.

Kabayatanna, kinuna ni Pres. Arroyo nga agbalin ti BPIP a rangtay tapno dumur-as ti agrikultura iti Ilocos Sur a karaman iti North Luzon Agribusiness Growth Quadrangle.

Daytoy ti maikadua nga ibibisita ti Presidente ditoy probinsia iti las-ud ti dua a bulan.

Idi Disiembre 30, 2009, inagunaran ni Pres. Arroyo ti Quirino bridge iti Bantay, Ilocos Sur ken ti Amburayan bridge iti Tagudin, Ilocos Sur kalpasan ti panangselebrarna iti Rizal Day ditoy probinsia.

Inkari ti administrator iti Presidente a pilitenda nga ileppas ti proyekto agingga iti Mayo.

Kalpasan ti pangaldaw, kadua met ni Savellano ti administrador ti NIA a nangkita kadagiti naaramid a dam ti BPIP a mangiturong ti danum kadagiti ili iti Amianan.#

Comments are closed.