Footer

Candon, nakapastrek iti P11-M iti BOSS

CANDON CITY – Agdagup iti P11 milion ti napastrek ti Business One Stop Shop (BOSS) iti duapulo nga aldaw a pannakainsayangkatna, segun iti business permits and licencing officer ditoy siudad.

Impakaammo ni Mary Jean Abrero, City Business Permits and Licencing Officer, bayat ti interbio kenkuana ti DZTP itay nabiit nga immabut iti P11,153, 580 milion ti napastrek ti siudad manipud kadagiti nasurok 3,000 a taxpayers a nanggundaway iti BOSS iti las-ud laeng ti 20 nga aldaw.

Kinuna ni Abrero a ti kadagupan a napastrek ket nasingiran manipud iti business tax, mayor’s permit ken dadduma pay a fees a kas iti garbage, zoning, building, environment, fire fees, transfer, medical and laboratory fees, garbage, business plate, occupation permits, renewal of contract, market loan ken dadduma pay.

Innayonna a ti napastrek iti BOSS ita a tawen ket nangatngato no maikumpara idi 2009.

Kinuna ni Abrero nga ad-adunto pay ti ngumatuan ti mapastrek agsipud ta madama pay la ti panagalaan iti permit iti negosio ken lisensia ditoy siudad ken adda dagiti negosiante a nagpili iti quarterly wenno semi-annual a modo ti panagbayadda.

Tinawen nga isaysayangkat ti gobierno ditoy siudad ti BOSS tapno matulongan dagiti agnegnegosio agraman dagiti traysikelan iti nabibiit ken naparpartak a panangilakadda kadagiti permiso ken prangkisada.#