Footer

EDITORIAL: Ti paltog ti instrumento ti kinadamsak iti eleksion

No naan-anayen a maipakat ti Resolution 8714 ti Commission on Elections, saanton a mapalubosan dagiti pribado a tattao nga adda ikutda nga armas nga agpapaay a badigard dagiti politiko a kaaduanna ti agbalbalin a private army ti politiko.

Nangipaulogen ti Comelec iti pammilin a ma-recall dagiti permit dagiti amin nga agikut iti armas, ket karaman ditoy dagiti law enforcement agencies ken pribado a grupo ti seguridad nga inikkan ti Philippine National Police (PNP) iti akreditasion kas badigard dagiti politiko.

Ipakat daytoy ti poll body tapno malapdan dagiti pammutbuteng, panagtambang, ken dadduma pay a kinadamsak nga adda pakainaiganna iti eleksion.

Asino laeng dagiti mabalin nga agikut iti armas iti panawen ti panagkakampania?

Dagitoyda: ti Philippine National Police (PNP), ti Armed Forces of the Philippines (AFP), ti National Bureau of Investigation (NBI), ti Bureau of Jail Management and Penology (BJMP), security personnel ti Philippine Ports Authority, Bureau of Immigration, Philippine Economic Zone Authority, Bureau of Customs, Manila International Airport Authority ken accredited nga ahensia ti seguridad.

Kuna ti Comelec a no kayat dagiti kandidato para iti lokal a mabutosan a puesto ti maaddaan iti security escorts, masapul a mangipilada iti aplikasion iti Regional Joint Security Control Desks iti lugarda nga idauluan ti regional director ti Comelec.

Iti sabali a bangir, dagiti kandidato para iti nasional a posision, agpilada iti aplikasion para iti security details iti main office ti Comelec iti Intramuros.

Masapul a mangidatag dagiti pangulo dagiti law enforcement ken security agencies iti listaan dagiti miembroda ken ti deskripsion dagiti armas nga iggemda iti sanguanan ti Committee on the Ban on Firearms and Security Personnel ti Comelec.

Kasta met a mapalubosan laeng dagitoy nga agiggem iti paltog no nakaunipormeda iti umisu ken addada iti aktual a performance of duty iti naitudo a lugar a pagtrabahuanna.

Napintas daytoy a gannuat ti Comelec tapno malapdan dagiti insidente ti kinadamsak a patauden ti nabara nga eleksion. Saan a mailibak a gapu iti panagraira dagiti paltog, maar-aramat dagitoy a pangkigtot, pammutbuteng ken panguloy iti biag tapno laeng maikkat dagiti lapped ni politiko a mangatiw iti eleksion.

Kasapulan ngarud nga aramidenen ti Comelec ti plano ti implementasion ti Resolution 8714 tapno maikkat dagiti armado a tattao a seguridad dagiti lokal a kandidato ngem kinapudnona, agpapaayda a kas pribado nga armada ti politiko a babaen laeng ti maysa a seniasna, madadaan nga agtignay tapno mapatalinaed ti bileg ken turay ti amoda a politiko.

Pagbalinentayo koma daytoy nga eleksion a natalna, naurnos ken nadalus. No agtuloy latta a sibbolen ti maysa a politiko ti puestona babaen ti ngudo ti paltog, ay-ay pay ti pagilian. Agtultuloyto latta dagiti umili a nakakawar iti babaen dagiti managimbubukod ken buklis iti turay ken bileg a politiko.

Saantayon nga itulok a mapasamak pay daytoy, kailian!#