Footer

INDAYON NI LAGIP: Makapagsakripisio ni Ayat (Tuloyna)

Wen, Manong Danny, uray kasano ti panangikalikagumko ken ni Marlon nga agtrabaho idiay ballasiw-taaw, diak nakir-in ti riknana. Kaykayatna ti agtrabaho ditoy Filipinas uray rigat latta ti adda.

Idi damo, saanko nga impinget ti panangpadasna iti gasatna iti ballasiw taaw. Ngem nariing daytoy idi nagbakasion ti maysa a kasadaranmi ken ni Marlon. Awan pay makalawas idi makasangpet, nagsangpeten dagiti bagon a nagkarga iti darat, bato, landok, haloblak ken kayo a pagbalayna.

“Dika kadi umapal ken ni Andres?” nakunak kenkuana idi nagpasiar ditoy balay. “Kitaem, dakkelen ti nagluposan ti biagda.”

“Talaga a kasta ti biag no suerteen ti kalugaranta,” nakuna ni Marlon.

“Awan, no dika agkuti, awan ti asenso ti biagmo… ti biagta inton agdennata,” nakunak.

“Ti importante, saanta nga aginnadayo ken naragsaktanto a dua,” kinunana.

“Kasano nga agragsakta no makurkurangan met ti kasapulanta iti biag?” inwagtengko ket pinanawakon ni Marlon.

Sumagmamano nga aldaw a liniklikak ni Marlon. No umay sumarungkar, pambarko a madmadi ti riknak. Wenno saan, agkubokubak iti kuartok. Saak la rummuar no makapakadan kadagiti nagannak kaniak.

Saan met nga agun-uni da tatang ken nanang. Ammoda lattan nga adda saanmi a nagkinnaawatan ken ni Marlon.

Ngem ay-ayatek ni Marlon ket maasianakto met la kenkuana ket mapukaw manen ti panagpauyok.

Ngem adda dagiti darikmat nga iduduko ti saludsod: maisakripisiok ngata ni Marlon no adda gundaway a dumteng a pakatungpalan ti arapaapko a lumung-aw iti biag?

Saanko a ninamnama a dumteng dayta a pasamak iti biagko.

Maysa nga aldaw, bayat ti panagdaldalusko iti likud ti balaymi, adda nagapo iti yan ti lalaktawan. Napanko kinita.

“Naimbag nga aldawmo,” inisemannak ti pangalkalbuen a lalaki a pattapattak, kataeban ni tatang. Iti tawenna nga innem a pulo, nasippukel pay la ti bagbagina. “Adda ni pari Ikko?”

“Awan, tata,” nakunak. “Apay kadi?”

“Kasangayko ngamin inton umay a lawas. Kayatko a mangtiliw iti kalding ken lima a manok tapno adda pagsasanguanmi dagiti sangailik.”

“Dakayo ni Tata Teban, ti akinkukua iti daga a suksukayen ni tatang?” sinaludsodko.

“Wen,” inisemannak ti lakay. “Ngem saan a Teban ti naganko. Steve. No diak agriro, sika tay balasang ni pari Ikko, saan?

“Wen, siak ni Cecil, Tata.”

“Ayna, diak impagarup a nagpintas gayam ti balasang ti parik,” nakunana.

Diak nakatimek.

“Awan sa ni Pari Ikko,” immisem manen ti lakay. “Di la mabalin a masaritamto kenkuana nga immayak?”

“Wen, Tata,” nakunak.

“Steve,” inyaturna. “Ken umaykayonto tumabuno iti kasangayko. Sika ti espesial a sangailik, mabalin?”

Pinerrengnak manen. Diak ammo ngem iti umuna a gundaway, urayak la timmarabang, Manong Danny.

(Adda tuloyna)