Footer

Kandidato para konsehal, napapatay

BANTAY, Ilocos Sur – Maysa a kandidato para konsehal ti pinapatay ti dua a lallaki a naglugan iti motorsiklo iti sanguanan ti balayna iti Barangay San Vicente, Magsingal, Ilocos Sur idi malem ti Enero 28.

Naitaray iti Magsingal District Hospital ni Cecilio Tolentino, 65, naasawaan, retirado a manager ti National Food Authority, kandidato nga independiente, ngem pimmusay bayat ti pannakatamingna gapu kadagiti grabe a sugatna.

Nakarekobre dagiti inbestigador iti uppat a kapsula manipud iti Cal. 45 iti nakapasamakan ti krimen.

Nupay kasta, kinuna ni Police Senior Supt. Eduardo Dopale a saan pay a maibaga nga adda pakainaigan iti politika ti pannakapapatay ni Tolentino ta di pay ammo ti motibo idinto nga imbilinna iti kapolisan ti Magsingal ti panangiwayatda iti naing-inget nga inbestigasion para iti madagdagus a pannakasolbar ti pammapatay.#