Footer

Pannakasaluad ti Karayan Abra, indagadag ni Gov. Bersamin

Bangued, Abra- “No awan ti Abra River, matay metten ti sibubukel a probinsia ti Abra,” daytoy ti kinuna ti gobernador ti Abra bayat ti kumperensia a naangay iti provincial capitol ditoy idi Enero 25.

Inannugot ni Abra Gov. Eustaquio “Takit” Bersamin bayat ti pannakaangay ti maikadua a “Conference on the Protection and Conservation of the Abra River” a naangay ditoy kapitolio nga adun dagiti gandat a mangsaluad iti karayan ngem awan ti nagballigi gapu iti kinaawan ti political will dagiti immunan nga agtuturay iti probinsia.

Innayon pay ti gobernador a napateg ti Abra River iti pakasaritaan ti probinsia gapu ta daytoy ti nagbalin a dalan dagiti Kastila idi simpaenda ti Abra.

“Aw-awagak dagiti mamayor dagiti ili a dalanan ti karayan ta ipakaammoda kadagiti kakapitan dagiti addang a mangsaluad iti karayan ta isuda ti direkta a makakitkita iti kasasaad daytoy. Saantayo nga urayen a dagiti taga-sabali a probinsia ti mangriing kadatayo,” kinuna ti gobernador.

Pinagyamanan ni Bersamin ti gobierno probinsial ti Ilocos Sur nga idauluan ni Gov. Deogracias Victor Savellano gapu iti inisiatiboda a mangisubli iti dati a kasasaad ti Abra River.

Kabayatanna, kinuna ni Presidential Adviser for Northern Luzon Dr. Enrie Mendoza II nga agserbi koma daytoy nga eye opener para iti amin tapno agmaymaysadan para iti pannakadalus ti karayan idinto nga inkarina ti tulongna tapno maidanon dagiti kasapulan ti grupo iti gobierno nasional.

“Idatagtayo dagiti addang iti Malakaniang tapno tumulongda iti pondo daytoy. Ita, aramidentayo dagiti mabalin ken kayattayo nga aramiden tapno mangrugin ti panaggaraw ti proyekto,” kinuna ni Mendoza.

Kinuna ni Mendoza a maysa kadagiti kasayaatan nga ubraen ita ti proyekto nga inawaganna iti KKK wenno Kawayan, Karayan, Kailian. Itoy a proyekto, mamulaan iti kawayan dagiti igid ti karayan tapno malapdan ti erosion, maigawid ti yaababaw ti karayan ket maisalakan ti adu nga umili.

“Daytoy ti kalakaan ken kadarasan a wagas ti reforestation. No maaramidtayo daytoy, sigurado nga agbiag manen dagiti agduduma nga indemic a lames ket masigurado met ti napintas a masakbayan ti Ilokandia ken Cordillera,” kinuna pay ni Mendoza.#

Comments are closed.