Footer

SALAYSAY: Vigan City: Siudad iti Daan a Siudad (Maudi a paset)

Malaksid dayta, maysan kadagiti daydaywen dagiti sangsangaili ken turista, lokal man wenno ganggannaet, dagiti tinawen a maisaysayangkat a parambak ditoy a kas iti Longganisa Festival tunggal Enero ken ti Binatbatan Festival tunggal Mayo.

Itay laeng Enero 22, aldaw a panagbalin ti Vigan a maysa a siudad, naisayangkat ti Longganisa Festival no sadino a nagsasalip dagiti partisipante a nangitampok iti daytoy nalatak a produkto ti Vigan. Ngem ita a tawen, adda nagbaliwan ti pasalip. Malaksid a maymaysan ti tokar a kumpasan dagiti makisalip, naisentron ti pasalip iti panagdayaw ken ni San Pablo, patron daytoy a siudad.

Alas dos pay laeng, nagdudupudopen dagiti tattao a naglilinia iti igid ti kalsada tapno imatanganda ti streetdancing competition. Kaadduanna kadagiti nagbuya ti saanen a naggawid ta inimatanganda met laeng ti showdown iti karabianna.

Rinibribu pay dagiti umay ditoy Vigan iti panangrambak ti simbaan iti Semana Santa ta ditoy ti kangrunaan a pakangilinan daytoy a lawas a napateg iti biag dagiti katoliko.

No agpasiarka iti Simbaan ni San Pablo, makitam pay la ti tugot ti napalabas, idi dagiti Kastila ti mangimatmaton pay iti simbaan. Makita pay laeng iti uneg ti Simbaan ni San Pablo ti dua a pulpito nga inar-aramat pay laeng dagiti padi a Kastila iti panagsermonda bayat ti misa. Malagipmi nga idi ubingkami pay, adda idi kasla alad iti asideg ti altar a pagparintumengan dagiti agkumonion tapno awatenda ti tinapay. Ngem awan itan ta mapapati a pinaikkat dagiti naud-udi a dadaulo ti simbaan. Agingga ita, dimi maawatan no apay a pinukawda ti maysa a nabileg a tanda ti napalabas.

Sabali laeng ti pannakaselebrar ti World Cities Solidarity Day iti Septiembre 7 tunggal tawen. Mangrugi metten nga aglatak ti Repazo de Vigan, ti parada a pakaitampokan dagiti panawen a naglasatan ti Vigan manipud idi tiempo dagiti Kastila, iti idadateng dagiti Amerikano, ti panangsakup ti Hapon daytoy nga ili, ti “nasipnget a panawenna” idi tiempo ti sakasaka a nagtunged iti panagbalinna a siudad ken maysan kadagiti narang-ay ken naprogreso a siudad.

Iti nasurok a 250 a tawen, tinakderan ti Siudad ti Vigan, babaen ti sirmata ken ganetget dagiti agtuturay ti reputasionna kas “siudad iti daan a siudad” ken kas sentro ti panagrang-ay iti Amianan.

Kas pammaneknek daytoy ti pannakagun-odna kadagiti naruay a pammadayaw manipud iti probinsial, rehional ken nasional a pasalip.

“No apay nga addaantayo ita iti namaris nga agdama, gapu ta nadungngo nga insagana dagiti ap-appotayo ti napalabas tapno sagrapen ken tagipatgentayo,” kinuna ni Mayor Eva Marie S. Medina idi rambakan daytoy a siudad ti maika-250 a panagtawenna a kas siudad idi kanikadua a tawen.

Pudno, no pumasiarka iti Vigan City ita, makitam pay laeng ti sigud a langa ti napalabas a saan a nabaelan a punasen ti moderno a panawen.#

Comments are closed.