Footer

INDAYON NI LAGIP: Makapagsakripisio ni Ayat (Tuloyna)

Kunak ni agang-angaw laeng ni Tata Esteban, ay Steve gayam, iti panangawisna kaniak ken dagiti dadakkelko iti itatabunomi iti kasangayna. Ngem maysa nga aldaw sakbay ti kasangayna, immay ditoy purokmi, kaduana ti dua a katulonganna ket nagpatiliw iti kalding ken manok a partienna.

“Juan, dikayto maaw-awan iti kasangayko,” kinunana sakbay a nagpakada. “Imbagakon ken ni Marlyn ngem ipalagipko manen.”

“Wen, umaykaminto tumulong nga agluto, Apo,” nakuna ni Nanang.

“Iti daytoy a panagkasangayko, saankayo a katulongan iti kusina no di sangailikayo.”

“Kababain, Mang Steve, kadagiti nangato a tattao a sangailim,” nakuna ni tatang. “Bay-annakami kadi lattan a tumulong iti kusina.”

“Ala, no kasta ti pagayatanyo, saankayo a piliten. Ngem saan a tumulong ni Marlyn iti kusina. Tumulong a mangasikaso kadagiti sangailik, okey?”

“No maikari datao a talkem a tumulong a mangasikaso kadagiti sangailiyo, Tata,” nakunak.

“Awagannak iti Steve. Bassit laeng a tawen ti baetmi ken ni Tatangmo,” kinuna ti lakay. “Ne, namnamaenkayo inton bigat, wen?”

Nabayagen a nakapanaw ni Tata Esteban ngem kasla di mamati ni nanang iti panangawis ti pakitaltalonanda iti kaaddada iti kasangayna.

“Ita man pay,” nakunana.

“Kursonadana la ketdi ni Marlyn,” kinuna ni tatang sanak tinaldiapan.

“Ay, makamanugangta sa metten, lakay, iti laklakay ngem sika!”

“Aniat’ dakesna, no agkinnaayatankami,” diak napupuotan nga imballaet.

“Ne, ta addan sa met rikna daytoy sumayyet nga anakmo,” immulagat ni nanang.

“Ni met nanang, di maangaw,” nakunak. “Ti kunam, gapu ta sangabantay ti kuartana, ikidemkon ti agat-lakay a pay-odna?”

“Oy, baka kasta la ti kunam ngem iti kamaudianan, isu ti pagtinnagam,” nakuna ni tatang.

“Kakaisuna nga adda metten ni Marlon a kaayan-ayatko,” nakunak. “Saanko nga isukat ni Marlon iti uray tallo nga Esteban a laklakayan!”

Agkatkatawa da tatang ken nanang a napan idiay talon. Intuloyko met ti trabahok iti uneg ti balay.

Ngem idi malabsak ti panakkelen a sarming iti diding, nabayag a minatmatak ti rupak. Saan a panangibuat iti bukodko a bangko, adu ti atiwek a kolehiala. No lumabasak iti ummong dagiti babbaro, madlawko ti panangisursurot dagitoy ti panagkitada kaniak. Uray ni Marlon, nakunana a siak ti kita ti babai a rumbeng nga ikabil iti pedestal.

Nagdakiwas dagiti matak iti pakabuklak: iti nabaknang a barukong a mangikarkari iti langit, iti pammagi a minuli ti kataltalonan nga awan duadua a mamaggurigor kadagiti Adan iti rabii. Ah, no agpayso ti atapna, daytoy a bagi ken lapsat ti nakatukay ken ni Tata Esteban!

Ania ngata nga agpayso no agayat kenkuana ti lakay? Awatenna ti ayat daytoy?

Immanges iti nauneg. Adtoyen ti gundaway tapno makalung-aw iti kinakurapay a mangiremremrem kenkuana ken dagiti dadakkelna. Ngem kasanon ni Marlon? Maisakripisiona kadi ni Marlon tapno laeng lumung-aw iti biag?

(Adda tuloyna)

Comments are closed.