Footer

BANNER NEWS: P3-B a bingay ti Ilocos Sur iti RA 7171, naruk-atanen: Usec Chavit

VIGAN CITY – Impakaammo ni Deputy National Security Adviser Luis “Chavit” Singson a naruk-atanen ti P3 bilion a bingay ti probinsia manipud iti R.A. 7171 ket mabalinen dagiti amin a munisipalidad nga usaren para kadagiti proyektoda.

“Maragsakannak a mangipadamag iti sapasap a tatta nga aldaw, maawat amin a munisipio diay bangkoda ti pondo… ket mabalindan nga usaren para kadagiti proyekto antes ti election ban,” inwaragawag ni Singson bayat ti programa ni Jun Ramos a Barangay Commando Brigada a naipatangatang iti DWRS idi Pebrero 12.

Kinuna ni Singson nga agdagup iti P3 bilion ti naruk-atan a pondo para iti Ilocos Sur manipud ti kadagupan a bingay a P6 bilion a maited kadagiti probinsia iti Rehion I nga agmulmula iti tabako manipud iti tobacco excise tax.

Malaksid ti Ilocos Sur, karaman a makibingay iti tobacco excise tax ti Ilocos Norte, Abra ken La Union.

Segun ken ni Singson, pinirmaanen ken inaprobaran ni Presidente Arroyo ti Executive Order 846 mainaig iti pannakaipakuarta dagiti saan a nailatang ken saan a naruk-atan a bingay dagiti local government units nga agparpartuat iti tabako a Birhinia manipud idi 2002 agingga iti 2009.

Sagudayen ti RA 7171 a maited kadagiti Virginia tobacco producing provinces iti rehion ti 15% a bingay manipud iti excise tax ti sigarilio.

Agdagup iti P3 bilion ti bingay ti Ilocos Sur manipud iti RA 7171 agsipud ta daytoy a probinsia ti kadakkelan iti produksion iti intero a Rehion I. Sitente porsiente iti produksion ti tabako ti aggapu iti Ilocos Sur.

Ti RA 7171 ti kangrunaan a linteg a pinutar ni Singson idi isu ti mangibagi iti umuna a distrito ti Ilocos Sur a mangbenbenepisiar kadagiti mannalon nga agmulmula iti tabako a Birhinia.

Nupay kasta, 30% laengen ti mapan iti probinsia agsipud ta 30% porsiento ti mapan iti congressional share ken 40% ti mapan kadagiti munisipalidad.#

Comments are closed.