Footer

SALAYSAY: No Napukawen ti Panagtalek

No awanen ti panagtalek, marpuog metten ti natibker a panagkakadua wenno urnos ti pamilia. Sangkailgat a kinapudno a mapaspasamak ita ken mapasamakto iti masakbayan iti nagbabaetan dagiti aggagayyem, pamilia ken kagimongan a paggargarawanda.

Pagarigan laengen da Mario ken Antonio. Nakasingsinged ti panaggayyem dagitoy dua. Saan a maituloy ti lakad ti maysa no saan a sumurot ti sabali. Ti kuarta ti maysa, kuartada a dua. No adda pagnam-ayan, pagranudanda a dua.

Adda kaayan-ayat ni Mario, ni Rose, maysa a accountant iti maysa a nalatak a negosio. Plano dagiti dua ti agkallaysa kalpasan ti pannakalpas ti kontrata ni Mario a panagtrabahona iti maysa a business firm iti Saudi Arabia. Dua a tawen ti kontrata ni Mario. Maysa a dakkel nga ospital ti patakderenda iti nasao a pagilian.

Natalged ni Mario a mangpanaw iti kaayan-ayatna agsipud ta adda ti gayyemna a talkenna a mangkita kenkuana. Ammona nga adda iti natalged nga ima ti kaayan-ayatna.

Bayat ti kaadda ni Mario iti ballasiw-taaw, saan a nagliwat ti panagsuratna ken ni Rose (awan pay ti selpon idi). Masansan pay a tumawag babaen ti long distance telephone. Dagitoy ti nagbalin a rangtay ti nagbaetanda.

No agsubalit ni Rose, sangkadayawna ni Antonio, ti kinaanus daytoy a mangkuykuyog kenkuana kadagiti pasken a pakaawisanna, ken mangliwliwa kenkuana kadagiti kanito a seknan ti pannakailiw.

Ni minsan, saan ngarud a dimmuko ken ni Mario ti uray sangkapit-ing a panagduaduana iti gayyemna.

Ngem idi dandanin malpas ti kontrata ni Mario, bimmattaway ti subalit ni Rose kadagiti suratna. Ngem saan a dimlaw ni Mario. Mabalin nga adu ti pakakumikomanna iti trabahona, nakunana iti nakemna.

Nalpas ti kontratana. No mabalin laeng, uloden ni Mario dagiti oras tapno makaawiden iti ilida. Ngem awan ni Rose ken ni Antonio a simmabat kenkuana iti airport nupay inyunay-unayna ti kaaddada koma iti isasangpetna. Plano ni Mario nga umianda iti maysa nga otel, agpasiarda a tallo iti iti siudad iti tallo nga aldaw, sadanto aggawid.

Gapu ta awan ti simmabat kenkuana, nagtarus ni Mario iti terminal ti bus nga agpa-Ilokos. Alas dies ti rabii ti nalugananna.

Apagisu nga aglawag idi makadanon iti ilida. Nangarkila iti traysikel ket nagpaitulod iti balayda. Kalpasan ti panaginana biit, nagpelles ket tinurongna ti pagopisinaan ti kaayan-ayatna. Saan a simrek daytoy.

Nagsaludsod iti maysa a kagayyeman ni Rose. Ngem kimmayakay daytoy.

Adda nabukel a suspetsa iti kaunggan ni Mario. Iti panagsalsaludsodna, naammuanna laengen a nagkallaysa iti hues ti kaayan-ayatna ken ni Antonio, ti gayyemna, tallo a bulanen ti napalabas. Kasla nagtupak ti langit ken ni Mario. Ti gayyemna a nangitalkanna ken ni Rose, liniputanna ti panagtalekna!

Nadamagna laengen nga iti naminsan nga idadar-ay dagiti dua iti maysa a pasken, nakalipatda iti bagida. Mabalin a gapu iti iliw ti babai, wenno gapu ta nakainum ti lalaki ket dida nadaeran ti riknada ket napugsat a naminpinsan ti kadena ti panaggayyemda.

Anian, nagtalek iti gayyemna ngem maysa gayam nga uleg a nangtukkaw kenkuana iti darikmat a nagbalin a nalupoy ti kaayan-ayatna.

Adu dagiti kakasta a gagayyem. Nga iti apagkanito, ibellengda a maminpinsan ti nabukel a nasinged a panaglalangem gapu laeng iti sangkadilmut a dayaw ken pagdur-asan ti biagda. Lipatendan a maminpinsan nga iti napalabas, adda maysa a gayyemda a sidadaan a mangisakripisio ti bukodna a pagimbagan ken ti naraniag a masakbayanna agsipud ta kastay kunada: “may pinagsamahan sila.”

Kasta met ti pamilia, uray no kasano ti panagpipinnateg iti nagbaetan dagiti agassawa ken dagiti annakda, no nagpukawen ti panagtalek, umaweren ti urnos ken talna iti uneg ti pagtaengan. Ta kasano koma nga ipategmo pay ti maysa a tao, nupay nagbalin a dakkel ti pasetna iti biagmo, no napugsat metten ti kawar ti panagtalekmo kenkuana? Ta uray anianto ti aramidenna iti masakbayan, addanto latta ti ngatangata, ti panagduadua. Mabalin a biddut a panirigan ngem dayta ti mansa a narigat a punasen ti maysa a mangliliput.#