Footer

BANNER NEWS: 10 ili, karaman iti election watch list ti provincial police office ti Ilocos Sur

BANTAY, Ilocos Sur – Sangapulo nga ili ti nairaman iti election watch list ti kapolisan ditoy probinsia, daytoy ti inwaragawag ti PNP provincial director ditoy itay nabiit.

Kinuna ni Police Senior Supt. Eduardo Dopale, provincial director, a karaman iti election watch list ti ili a Caoayan, Cervantes, Sta. Catalina, Sta. Maria, Sto. Domingo, San Emilio, Del Pilar ken Sugpon.

Segun ken ni Dopale, nairaman dagitoy nga ili iti election watch list agsipud ta napudot ti politika kadagitoy a lugar iti napalpalabas nga eleksion.

“Dagitoy nga ili ti ikkantayo iti prioridad nangruna iti peace and order no mangrugi ti campaign period,” kinuna ni Dopale.

Idi madakamat ti reaksion ni Mayor Mario Tugade iti pannakairaman ti Caoayan iti election watch list ti provincial police office idinto a saan met a napudot ti politika iti ilida, kinuna ni Dopale nga iti napalabas nga eleksion, adda rekordna (Caoayan) nga “intense political rivalry”, isu nga adda iti listaan dagiti masipsiputan nga ili.

Iti eleksion idi 2007, nagsango para iti kinamayor ni Tugade ken ni dati a konsehal ti Vigan City Germie Singson-Goulart, kabsat ni Deputy National Security Adviser Luis “Chavit” Singson. Inabak ti agdama a mayor ni Goulart.

Kandidato manen ni Goulart para mayor ket kasangona ni Atty. Tito Tugade, kabsat ni Mayor Tugade nga agturposen iti maikatlo a terminona.

Nupay kasta, inyunay-unay ni Dopala a saan pay a hot spot dagitoy nga ili iti baet a masipsiputanda ken awan pay ti maibilang a hot spot iti probinsia.

Impakaammo pay ni Dopale a piton a tao ti natiliwan a nagsalungasing iti election gun ban. Lima kadagitoy ti natiliwan nga agikut iti paltog idinto a dua ti nakumpiskaan iti replica ti paltog.

Segun ken ni Dopale, parehas ti pannusa a maipakat kadagiti matiliwan iti paltog ken toy gun kabayatan ti election gun ban.

Kinunana a naipilan ti kaso maikontra kadagiti nagsalungasing iti daytoy a paglintegan ti Comelec.#

Comments are closed.