Footer

EDITORIAL: Adda met la ngipen ti Comelec Resolution No. 8758?

Nangrugi ti campaign period para kadagiti national candidates idi Pebrero 9 idinto a mangrugi para kadagiti lokal a kandidato inton Marso 26. Agpada nga aggibus ti panagkampania para iti nasional ken lokal inton Mayo 8.

Intuding metten ti Comelec ti gastuen dagiti kandidato: para iti kinapresidente ken kinabise-presidente, naituding a gumastoda iti P10 kada botante malaksid laeng iti P5 a gastuen ti partidoda kada botante. Para kadagiti kandidato nga addaan partido, aggastoda laeng iti P3 kada botante. Nupay kasta, mabalin ti nakaikappenganda a partido ti aggasto iti P5 kada botante para iti tunggal opisial a kandidatona.

No maibatay iti bilang dagiti botante idi 2007, malimitaran ti kandidato para presidente ken kinabise-presidente iti P675 milion idinto a P360 milion kadagiti kandidato a para senador, segun iti maysa a poll watchdog.

Karaman dagiti campaign expenses ti magasto para iti advertisement iti telebision, radio ken warnakan, posters ken streamers ken dadduma pay a campaign paraphernalia.

Kanaig daytoy, binallaagan ti Comelec dagiti kandidato nga addaan “infomercials” wenno anunsio iti warnakan a baliwanda dagitoy tapno maiyannurot kadagiti pagannurotan nga intuding ti poll body tapno saanda a maibilang a kontrabando ken sumango iti pannusa.

Kasta met nga addan limitasion nga air time dagiti anunsio dagiti kandidato a maipatangatang babaen iti broadcast media. Para iti presidential, vice presidential ken senatorial aspirants, maikkanda laeng iti maximum a 120 minutos tunggal estasion, pakairamanan ti pannakaipatangatang iti cable, ken sabali pay a 180 minutos tunggal radio station. Iti biang dagiti lokal a kandidato, mapalubosanda laeng iti 60 minutoes nga air time kada TV station, karaman ti cable, ken sabali a 90 minutoes iti radio.

Malimitaran met ti print ads dagiti kandidato ta mapalubosan laeng dagiti kandidato, nasional man wenno lokal a puesto, nga ag-anunsio iti mamitlo iti makalawas iti aniaman a broadsheet, tabloid wenno magasin ket agpatingga laeng iti 1/4 page ti kadakkel ti anunsio para iti broadsheet ken 1/2 page para iti tabloid.

Maiparit ti pannakaipaskil dagiti campaign materials kadagiti publiko a luglugar a kas iti kalsada, rangtay, pasdek publiko, kaykayo, posposte ken barut, pagadalan, monumento ken kangrunaan a pagnaan ket adda ituding ti Comelec common poster areas a pakaikabilan dagiti posters dagiti kandidato.

Kuna ti poll body nga aniaman a panagsalungasing iti Comelec Resolution 8758 ket maibilang nga illegal a panagkampania a maysa nga election offense ket asinoman a mapaneknekan a nakabasol, sumango iti pannusa a makatawen agingga iti innem a tawen a pannakabalud ken diskualipikasion nga agtakem iti public office, kasta met a maipaidam kenkuana ti kalintegan nga agbutos iti nasional nga eleksion.

Ngem ti saludsod: adda met la tangken ti Comelec a mangipakat kadagitoy a paglintegan idinto nga iti kallabes ket makita nga awan ti gawayna a manglapped iti panagsalungasing dagiti kandidato? Mangsampol ketdi koma ti Comelec tapno agpangadua dagiti kandidato nga agipakat kadagiti panagsalungasing kadagiti pammilin ken paglintegan iti eleksion.#

Comments are closed.