Footer

Komentario: Diborsio kadi ti sungbat iti di panagkatunosan dagiti nagannak?

KAILIAN, mayatka kadi a maaddaan ti diborsio iti pagilian? Nasken kadi ti diborsio? Kasapulan kadagiti diborsio tapno matun-oyantayo manen ti ragsak a naipaidam kadatayo iti denna ti immuna a nakaigalutantayo?

Taliawentayo ti Biblia. Mabasa iti Mateo 5:31-32: “Siasinoman a lalaki a mangisina iti asawana, masapul nga ikkanna iti kasuratan ti panagsina. Ngem ita, ibagak kadakayo a no isina ti lalaki ti asawana idinto a sipupudno kenkuana ti babai, mapabasol dayta a lalaki iti pannakikamalala no makiasawa manen. Kasta met a makabasol iti pannakikamalala ti mangasawa iti naisina a babai.”

Ti diborsio dayta kasuratan a nadakamat iti Mateo. Ngem nabatad ken nadagsen ti sagabaen iti diborsiado no mangasawa manen. Saludsodentayo: ania ngarud ti rason a makidiborsioka no makabasolka met laeng no makiasawaka manen?

Iti punto dagiti kontra diborsio, agbalin laengen a kas gagangay a lisensia ti nasagraduan a lisensia ti kasar. Agbalin pay ketdin a kasla abalbalay ti asawam a no maumakan, mabalinmo lattan ti mangipila iti diborsio ket mangasawaka manen. Iti daytoy nga anggulo, awanen ti pateg ti kasar ta ad-addan a pisikal a pagragsakan ti bagi ti ad-adda a maipangruna.

Malaksid iti dayta, kasanon dagiti maipit iti dayta a situasion, kas iti dayaw wenno dagiti annak?

Dakkel a parikut ti pakainaigan dagiti annak. Maipit dagiti ubbing. Saanda nga ammo ti surotenda. Ti ina wenno ti ama. Iti dayta a pannakatikawda ken pannakaipitda, dakkel ti agbalin nga epektona kadakuada.

Saan a naragsak dagiti annak ti broken family. Ad-adda a nariribuk ti panagbiag dagiti annak a nagtaud iti nawara a pamilia. Ad-adda a mairarem iti kinadakes, bisio ken krimen dagiti annak gapu iti pannakabaybay-ada iti panagsina dagiti dadakkelda. Daytoy ti pakaisupadianda kadagiti annak a tumanor iti sidong ti natalingenngen a pagtaengan.

Ngarud, no dakkel ti epekto ti panagsina dagiti nagannak iti annakda, nakarkaro manen no mapatalgedan ti panagsinada babaen ti diborsio ket mangbukelda iti sabali a pamilia a posible a pakariknaan dagiti annak iti pannakailaksid ken pannakabaybay-a.

Ti panagasawa ket saan a kasla innapuy a no napudot ket mabalinmo lattan a yula. Isu ngarud a nasken ti panangtimbang a nalaing iti puso, no sisasagana wenno kapkapnekanna ti sumrek iti naestaduan a kasasaad. Ta daytoy panagasawa ti aw-awaganda iti “street of no return”. Ta saanen a mabalin a pagsinaen ti tao ti pinagtipon ti Dios.

Ngarud, iti bukodmi a panirigan, saan a rumbeng a maipakat ti diborsio ditoy pagilian. Kadakami, saan a diborsio ti sungbat iti aniaman a problema dagiti nagannak.

Kadakami, ayat, panagtalek, panagsinnaranay ken panagpinnaranud dagiti kadena a mamagtitipkel iti maysa a pamilia.#

Comments are closed.