Footer

Naiwaras a paltog kadagiti barangay captains, naipasubli

STO. DOMINGO, Ilocos Sur – Naisubli dagiti paltog a naiyisio kadagiti barangay captains ditoy nga ili idi Pebrero 10 iti sanguanan ti panangbabalaw ti maysa a kandidato ken maysa a konsehal ditoy iti pannakaiwarasda sakbay ti masungad nga eleksion inton Mayo daytoy a tawen.

Iti pannakiuman ni Jessie Ancheta ken ni PNP Provincial Director Eduardo Dopale a naipatangatang iti Bombo Radyo idi Pebrero 10, kinuna ni Dopale a naisublin dagiti paltog a naiwaras kadagiti barangay captains ti Sto. Domingo ket naideposito dagitoy iti police station ti Sto. Domingo.

“Mabalindanto nga alaen dagiti paltog inton malpas ti eleksion agsipud ta lisensiado met dagitoy,” kinuna ni Dopale.

Agdagup iti 36 a paltog a pakairamanan ti 3 shotgun ken maysa a cal. 45 ti mapapati a naiyisio kadagiti barangay captains. Naammuan a ti laeng barangay captain ti Vacunero ti saan a nawarasan iti paltog.

Sakbayna, binabalaw ni Konsehal Mario Tajon ti mapapati a pannakaarmas dagiti barangay captain sumagmamano a bulan sakbay ti eleksion.

Kinuna ni Tajon a saan a naglasat iti naan-anay a proseso kas iti bidding ti pannakagatang dagiti paltog a naiwaras kadagiti barangay captain.

Kinuna pay ni Tajon a saan a napakpakaammuan ken awan ti apropriasion iti pannakagatang kadagiti paltog.

Ngem inkalintegan ni Mayor Floro “Butch” Tadena a legal amin ti naglasatan ti pondo iti pannakagatang dagiti paltog idinto nga innayonna nga adda a naipalaon iti Supplemental Budget No. 2 a naaprobaran idi June 2, 2009 nga agdagup iti P700,000 para iti pannakagatang dagiti paltog.

Kinuna ti mayor a nairanrana (ngata) nga absent ni Tajon idi naaprobaran ti supplemental budget, isu a dina ammo.

Ngem kinuna ni Tajon nga “awan met ti rason a maarmasan dagiti barangay captain ta kas pagaammotayo amin, naulimek, very peaceful nga ili ti Sto. Domingo.”

“Awan ti authority ti munisipio nga aggatang iti paltog a para kadagiti barangay captain,” kinuna pay ni Tajon sana innayon a ti koma kapolisan ti nakaiwarasanda agsipud ta agkurkurang ti armasda ken isuda ti autorisado nga agiggem iti paltog.

Kinuna ti mayor nga apaman a naaprobaran ti supplemental budget, inaprobaran ti municipal development council ti resolusion ti Association of Barangay Captains a maiyalokaranda iti pondo a maigatang iti paltog para iti napigpigsa a panangmentenerda iti peace and order iti lugarda.

Kinuna ti mayor a naglasat iti commission on audit ken iti DILG ti pannakagatang dagiti paltog.

Kinuna pay ti mayor a naipanagan dagiti paltog iti munisipio ket naipasublat laeng kadagiti barangay captains.

Kinuna ni Dopale nga inyunada ti Sto. Domingo ket sumaruno dagiti dadduma nga ili a mapapati a nawarasan met iti paltog dagiti barangay captain.#

Comments are closed.