Footer

Retirado a kameng ti Army, napaltogan

SAN JUAN, Ilocos Sur – Maysa a retirado a soldado ti pinaltogan ti nakasubangna a kalugaranna iti Barangay Bacsil ditoy nga ili idi Pebrero 10.

Nagsagaba iti tallo a tama ti kalibre .45 ni Antonio Villarin, 48, iti tengnged, abaga ken makinkanawan a sakana kalpasan a pinaltogan ni FO3 Rolly Pascua, 40, maysa a fireman, idi Pebrero 10 a puon ti nakayospitalanna.

Basar iti police blotter, pinuted ti biktima ti sanga ti mula a dates ti ina ti suspetsa sana imbelleng iti paraangan daytoy. Gapu iti daytoy, nagsubang ti biktima ken suspetsa ket innala ni Pascua ti paltogna sana pinaltogan iti namitlo ti retirado a soldado.

Naitaray ti biktima iti Suero Clinic and Hospital tapno mataming idinto a boluntario met a simmuko ti suspetsa iti kuerpo ti polis iti nadakamat nga ili.#