Footer

SARITA: Ti Kontra Tsiks ni Ipag (Maudi a paset)

AGPUPULOTANKAMI a lallaki iti tinadtad a bidawbidaw a naupran iti suka’t sili ito’y a malem a kassangpet ni Iloy a nagsigay.

“Yaay! Al-alia! Adda zombie, kadakuada!” ni Manuel a kunam la no mabuteng ta pang-FAMAS ti artena. Idi taliawek ti likudak, nagmayat ti widawidan ni bilas iti puraw a kadaratan a bibig ti matmaturog a Sual Bay.

“Kaarruba! Mangrikepkayo! Iliktadyo dagiti agdanyo! Adda sumungad a zombie!” pinagimbudo pay ni Manuel dagiti dakulapna iti inna panaglaaw.

“Hu, salbagka met, Manuel, ania ti sasawem aya?” inkusilap ni bilas Colas a nagtugaw iti napagabay a dua a wasnay a kawayan a tugawan ti papag.

Kunwari, simmalipengpeng kaniak ni Manuel iti butengna ket nagkakatawa dagiti kakaduami. Ad-addan ti paggaak ti ummong.

“Bayaw Edu, adda zombie. Nagungar a bangkay. Ayyapo, nakabutbuteng! Awwooo! Awwooo!” tinuladna pay ti taguob.

Ad-addan ti garakgak. Di nakateppel ni bilas ket kellaat a dinarupna ni Manuel nga induron ket naiparusisi ni sutil.

“Agiduron ti zombie, kaarruba!” uray no sipaparusisi iti puraw a kadaratan, pinagimbudo pay laeng ni sutil dagiti dakulapna a nagpukkaw.

“Anak ti lasi ka!” inlayat ni bilas ti kugtarna, ngem dina intuloy ket madamdama, nakipagkatkatawa metten.

Timmakder ni Manuel. Immasideg ken ni bilas a singlot a singlot.

“Nabanglo met. Agat-Jovan. Saan met nga agatpormalin?”

“Ne, ta pasubsubankan…” immusiig ni bilas.

Kinuddot ni sutil iti bakrang ni bilas. “Sibibiagka, insan?” inkiremkiremna.

“Natural!”

“Ow!”

“Lasika!”

“Ket no ipampanesannaka ni ipag Reming!”

“Agpadakayo a dagmel!” induronna ti apagapaman ti sutil. “ Ti kuttongit met nga agat-alhambra ti sang-awna, di la ketdin agbain iti ar-aramidenna,” inngayemngem ni bilas.

“Ket sika, loko, dika agbain ti inka panagbabai? Babbalasangen dagiti dua a putotmo, agaramidka pay la iti linoloko!” imbales ni katugangak a lakay.

Di nakatimek ni bilas.

“SIGEN a, ankel. Bagbagaamon da tatang ken nanang,” impakaasi ni Marilyn, ti inaunaan kadagiti dua a babbalasang da bilas.

Uray pay ket ni baket, sangkaibagana a bagbagaak ni bilas bareng patiennak. Ngem kinunak nga agingga a saan a sitatallugod nga agbabawi ni bilas iti inna ar-aramiden, dinto dumteng ti pammagbaga kenkuana.

“Diay kano Paitan ti pagnanaedanna, angkel,” kinuna manen ti balasang ket tinangadna ti mangalastres nga init iti nganga ti tawa.

“Naglawa ti Paitan…” kinunak.

“Agpakuyogkan a ken Jerson, angkel.”

Kasla krismas tri ti pampasahero a Sarao. Agsisinnakloten dagiti babbai ken babbaket iti uneg, napnon dagiti lallaki iti kargadera iti tuktok, piton sa ti nagkalumbitin iti kutit, uppat iti hood ket iti tapalodo iti asideg ti drayber ti ayanko.

Mabalin met ketdi ti aglugan iti motor boat, ngem no kastoy a kadawel ti baybay, naslepkanton a sumagnpet idiay ili, isu nga inanusakon ti aglugan iti dyip. Nasken a makasaritak ni bilas. Ngem diak masigurado no ipangagnak.

Nabirokak ni bilas iti igid ti baybay, kaduana ti barkadana. Madama ti panagiinumda. Inkissiimko ti panagsaritami.

“Agpanunotka koma, bilas. Saan laeng a ti Pangascasan ti pagdinamagan ti panagpampanes ni ipag no di pay iti sibubukel nga ili. Impalualoannaka payen. Dinomingo pay a yawatannaka iti misa idta simbaan.”

Mababain iti panangipudosko kenkuana idi perngek ta nagdumog.

“Bilas, no natayka man iti pangibilanganna kenka, nasken a maipasngayka met babaen ti panangabaruanam.”

“Mabainak ngarud, bilas. Kayatko metten ti aggawid ket namimpaten a napanak diay balay ngem pinakayabannak iti pagpampana iti ikan. Saan laeng a pana ti isagsaganana kaniak no di pay tarapang.”

Tarapang- tay kasla gayang ni Satanas.

Imbagak a kuyogek a dumatag. Immannugot met ta tinarayan kanon ni Bisayana kalpasan a naugotanen ti singkuenta mil a bangkoda.

Kabigatanna, nagturongkami iti balayda. Panaen koma ni ipag ni bilas ngem nagpatngaak.

“Reming, baket, nautobkon ti amin. Pangaasim ta pakawanennak koma. Saanakon nga agtsiks pay, pramis. Kros may hart,” pinagkinnawwet ni bilas dagiti tammudona.

“Diak mamati iti sasawen ti nagungar a bangkay!” bales ni ipag a nangpetpet iti tarapang.

“Ipag, pakawanemon. Napudno ti panagbabawi ni bilas.”

“Pudno dayta, baket. Nangabakka. Katkatawaandakon dagiti tao. Isu a pakawanennak koma metten a.”

Naglibbi sa nagmisuot ni ipag.

“No natay man ni bilas, ipag, ita, naipasngay met manipud iti basol. No pakawanem, maipasngay manen ti sabali pay a ragsak ken linnangen ti pamiliayo.” Kiniddayak ni bilas a lamiongenna ni ipag.

Napatit ti dakulap idi gandatenna ti umapros. Timmalikudakon. Adda nangegko a kalimbatog. Nagriaw ni ipag. Ngem in-inut a kimmapsut ti iriagna ket madamdama, naulimeken iti uneg ti balay.

Napaisemak. Inton bigat, sigurado, agwaksi ni ipag!#

Comments are closed.