Footer

BANNER NEWS: Panaglukat ti tobacco trading season, grupo dagiti mannalon, nagrali

CANDON CITY – Napateg nga aldaw kadagiti mannalon ti tabako ken dagiti traders ti Pebrero 15 ta daytoy ti mangipasidumaag ti panangrugi iti pormal a panaggatangan iti berde a balitok.

Ngem kagiddan met daytoy ti panangisayangkat dagiti mannalon ken dagiti kameng ti Solidarity of Peasants Against Exploitation (StopEx) Ilocos Sur ti maysa a rally tapno yarungaingda ti nangatngato a presio ti tabako.

Agarup 50 a mannalon manipud iti nadumaduma nga ili iti Ilocos Sur ti nangisayangkat iti agarup maysa nga oras a rally idiay Candon Plaza iti daytoy nga aldaw.

Kinuna ni Zaldy Alfiler, agdama a secretary general ti StopEx-Ilocos Sur nga insayangkatda ti rally tapno iyarungaingda ti pannakaipatungpal ti P95 tunggal kilo a presio ti tabako nga awan klasipikasion.

Kinuna ni Alfiler a naggapu idiay Cabugao, Candon City, Santa Lucia ken dadduma pay nga ili dagiti mannalon a nakipartisipar iti rali.

Inlawlawagna a kas maibasar iti kuentada a magasto ti mannalon iti produksion, mayannatup laeng ti presio a P95 tunggal kilo nga awan klasipikasion dagiti bulong.

Ngem inlawlawag ni Estrella de Peralta, In-Charge ti National Tobacco Administration iti Candon City Branch nga agdepende ti presio ti tabako iti kalidadda.

“No awan klasipikasion ti bulong ti tabako, amangan no didanton agmula pay iti de-kalidad a tabako,” kinuna ni De Peralta

Inlawlawagna nga amangan no ad-adunton ti reject a produksion, ket no kasdiay ti mapasamak, amangan no in-inutton nga agpukaw ti industria ti tabako.

Idi napalabas a tawen, P61 ti presio ti tabako a double AA idinto a P23 ti reject. Ngem immabot iti nasurok P90 ti panaggatangan nangruna kadagiti napintas ti kalidadda a tabako.

Idi Pebrero 19, 2010 a napirmaan ti memorandum of agreement a manayonan iti P5 ti floor price ti tabako a naituding iti napalabas a panagtatabako.

Maipalagip nga idi napalabas a tawen, naisayangkat ti tripartite conference tapno mapagnunummuanan ti pannakaipangato ti presio ti tabako ket adu a mannalon ti nadismaya idi P5 laeng ti intuon dagiti traders iti floor price ti tabako.

Maisaysayangkat ti tripartite conference maminsan iti tunggal dua a tawen tapno mapagnunummuanan dagiti mannalon, manufacturers ken traders ti maituon iti floor price ti tabako.#