Footer

EDITORIAL: US-RP Balikatan Exercies: pannakaitandudo ti panagdur-as ti kaskenan a tun-oyen

Kanunonganmi la unay ti pannakaiwayat ti US-RP Balikatan civil-military operation kadagiti dua nga ili ti Ilocos Sur kas maysa a wagas a panangitandudo iti panagdur-as lalo la unay kadagiti nasulinek a lugar a kas iti Barangay Marnay, Pias ken Baluarte iti ili a Salcedo ken iti Barangay Teppeng ken Cadanglaan iti Sinait.

Namnamaenmi a maited ti awan sawsawirna a pannakipulapol ken pannakigamulo tapno agtignay dagiti 250 a kameng ti Civil Military Operations United States Army Pacific(CMO-USAP) nga awan sawsawirna nga agpartisipar iti US-RP Balikatan operation wenno humanitarian assistance babaen ti panangbayabay kadakuada ti Armed Forces of the Philippines(AFP). Ipaay koma kadakuada dagiti awanan kondision a pannakipartisipar wenno suporta para iti pannakailukat ti dur-asan kadagiti nadakamat a luglugar a tartarigagayan la ketdi dagiti agindeg kadagiti nasao a luglugar ken kadarappatna.

Maysa a panangtaliaw ken panangidiaya kadagiti serbisio kadagiti disso nga agkasapulan iti tulong ti RP-US Balikatan Operation. Kas ti pannakaipatakder ti dua a classroom ken water system iti Barangay Teppeng ken Cadanglaan, Sinait, Ilocos Sur, ti pannakaipasdek ti water system ken flood control barrier iti Barangay Pias, pannakaipatakder ti dua a classroom iti Barangay Marnay ken health center iti Barangay Baluarte para iti pannakasaluad ti salun-at dagiti addaan an-anayen, saan laeng dagiti bumarangay no di pay dagiti agnaed kadagiti kaparanget a luglugar.

Maitutop unay ti naannayas a pannakaipagna ti kastoy a humanitarian assistance agsipud ti papigsaenna ti nairut a relasion ti United States ken ti pagilian. Agpada nga agnumar iti pagimbagan dagiti dua a nasion ken dagiti kaparangetda iti rehion isu a kunaenmi a rumbeng la unay nga ited ti suporta itoy a gannuat.

Babaen kadagiti kastoy a humanitarian operations dagiti dua nga armada, agtultuloy met ti panagsisinnukatda kadagiti kapanunotan ken istratehia para iti pagimbagan ti sapasap. Babaen ti panagiinnadal iti ammoda iti teknolohia ken taktika ken ti pannakaipagna dagiti community development projects, dakkel la ketdi ti magun-odan daytoy a military exercises. Nupay makuna a military exercises dagitoy, maibilang met a civilian in nature ta saanda met a makipartisipar iti aniaman a tignay a maibusor para iti seguridad ti pagilian. Agserbida laeng dagitoy nga exercises para iti ad-adu pay a wagas iti trening dagiti kameng ti armada ti dua a pagilian.

Namnamaenmi a maipakita laeng iti Balikatan exercises ti makapnek a civilian-military operations a saan a nalaokan iti combat operation. Mangidiayada laeng koma iti tulong ken panagdur-as wenno mangilukat iti ridaw para iti panagbalbaliw tapno aglupos dagiti lugar a tulonganda. Babaen ti panagtinnulong, panagsisinnukat iti ammo ken kabaelan a matun-oyan ti panggep daytoy a gannuat.#