Footer

INDAYON NI LAGIP: Makapagsakripisio ni Ayat (Tuloyna)

Saan a simmarungkar ni Marlon iti nagsaruno a dua a lawas. Ammok lattan a nasakit ti nakemna. Ngem saan a siak ti umuna a rumukma agsipud ta awan ti dakes nga inaramidko, nakunak iti nakemko. Napudnoak ken ni Marlon.

Linawas metten a sumarungkar ni Steve ditoy balay. Adda latta regalona kaniak. Naragsak a kasarsarita. Adu ti estoriana a makapakatawa.

Maysa a malem, impudnonan ti ayatna.

“Saannak nga ipokrito a mangilemmeng iti riknak kenka,” nakunana. “Sika ti kayatko a katakunaynayko iti biag.”

Nupay ninamnamak a dumtengto ti aldaw nga agpudno ni Tata Steve, diak nakatimek iti dayta a gundaway. Nagdumogak ta kasla diak madaeran ti perrengna.

“Kayatko a maammuan no adda kaikariak dita ayatmo,” nakuna manen ni Tata Steve.

“Kumitaka koman iti sabali, Tata,” nakunak. “Aduda ditoy nga ad-adda a maikari iti ayatmo. Nanumo laeng ti pamiliami.”

“Saan a ti klase ti pamilia ti makatubeng iti panagayatko. Ti importante, ayatennak ta siak ti siak.”

“Addan nobiok, ammom met siguron dayta,” nakunak.

“Saankayo pay met a nagkallaysa. Agingga iti nawayaka pay, saannak nga agsardeng agingga iti saanko a magun-od ti wenmo.”

Maysa a malem, simmarungkar ni Marlon. Nakalablabbasit. Ammok lattan a nakainom.

“Aglinnawagta!” nakunana. “Siak wenno dayta nga Esteban!”

“Baliwantanto ti agsarita inton saanka a nakainom,” tineppelak ti luksawko.

“Ammok, kayatnakon nga isukat agsipud ta adu ti kuartana. Nanam-aykanton iti dennana.”

“Pangngaasim, dika koma agpanunot ti kasta. Imprangkakon ken ni Tata Steve nga agnobiota. Ngem kinunana nga ituloyna latta ti agdaton kaniak agingga iti saanta pay a nagkallaysa.”

“Apay a sanguem pay laeng no umay agpasiar ditoy balayyo?

“Kinabastos daytan no diak sanguen idinto nga awan met ti dinudursok nga ipakpakitana,” medio masemsemakon. “Ken maysa, kas makitaltalon laeng kenkuana, kasapulanna ti respeto.”

“Sige, ikalintegam. Makadlawak met ket. Adda met riknam kenkuana. Agasem, saanton a datar ti pagturogam no di nalamuyot a kama.”

“Ania metten, nagbaban ti panagkitkitam kaniak?” ngimmato ti timekko.

“No pudno nga ay-ayatennak, sumurotka kaniak itan,” kellaat a kinuna ni Marlon.

Diak nakatimek. Nabayag a minatmatak ni Marlon.

“No talaga nga ay-ayatennak, agtaraytan,” kinuna manen ni Marlon.

“Saanka pay a sisasagana. Ania ti agbalin a masakbayan dagiti agbalin nga anakta?”

“Makaammodtan. Ti importante, saanka nga agtinnag iti daydiay nga Esteban!”

“Saan a kasla napudot nga innapuy a yulam lattan ti panagasawa, Marlon!” nakunak. “Sori, dinak mapasurot iti paggayatam.”

“Ikkanka iti makalawas nga agpanunot. No dika makadisidir iti dayta a tiempo, agsinata laengen!” kinuna ni Marlon.

Timmakder ket nadagsen ti sakana nga immulog iti balay.

(Adda tuloyna)

Comments are closed.