Footer

SALAYSAY: Kannawidan Ylocos Festival 2010: mangipasagepsep kinapateg kultura ken mangitandudo produkto ti probinsia (Umuna a paset)

Maminsan pay, sinelebraran ti probinsia nga Ilocos Sur ti Kannawidan Ylocos Festival manipud Enero 28 – Pebrero 3, 2010 kas panangrambak iti maika-192 nga anibersario ti pannakaisina ti Ilocos Sur kas naan-anay a probinsia babaen ti bileg ti Royal Decree napetsaan idi Pebrero 2, 1818. Manipud idi 2008, nagbalinen nga agtinawen a parambak ti Kannawidan nga addaan gagem a mangipasagepsep kadagiti Ilokano ti pateg ti pannakapreserba dagiti nabaknang a tawid a kultura, kannawidan ken tradision ken ti pannakaitandudo dagiti produkto iti talon ken agduduma a produkto ti probinsia.

Kas panangipakita iti panagayat iti Namarsua, nairugi ti selebrasion babaen ti nasantuan a misa iti St. Paul Cathedral ket ditoy a nagmaymaysa dagiti opisial ti probinsia, dagiti empleado ti kapitolio ken dagiti umili a nagyaman iti Dios para kadagiti impaayna a parabur. Naisaruno ti maysa a libut wenno prosision a nakaiparangan dagiti amin a patron a santo iti 40 a parokia ti probinsia ken dagiti agduduma a ladawan ni Santa Maria.

Kalpasan ti prosision, naluktan ti Ramen ken Raman Food Festival iti Plaza Salcedo ket libre a nakipangrabii ditoy ti publiko. Iti naladaw a sardam, naipabuya met ti komedia a napauluan, “Biag ni Prinsipe Victor”. Nabayagen nga awan ti naiparang a komedia iti entablado ket maibilangen a matmatay a literatura daytoy. Makaparag-o ngarud ti kaburnok dagiti tattao a nagbuya.

Iti maikadua nga aldaw, naluktan ti Partuat ken Patanor Trade and Agri Fair a nakaiparangan dagiti produkto ti probinsia babaen kadagiti nakipartisipar nga ili ken SMEs karaman ditoyen dagiti One Town One Product (OTOP) ken tradisional a produkto dagiti munisipalidad. Adda pangregalo, ay-ayam, para iti uneg ti balay, naproseso a makmakan, alikamen, ken adda pay mulmula. Malaksid itoy, adda pay 102 nga exhibitors manipud iti 14 a nadumaduma a probinsia iti Luzon.

Napili a Best Dressed Booth ti puesto Sta. catalina, Most Innovative Product ti Buri Divider nga aramid ti Gab’s buricraft ti San Juan ken inyalat ni Marilou Torres ti On the Spot Demo Award para iti buri shopping bag a dineseniona. Iti rekord ti DTI Ilocos Sur, nakaganar ti trade fair iti P7.5 milion iti innem nga aldaw.

Iti benneg ti agrikultura, nagsasalip dagiti nadumaduma a produkto iti talon para iti PINAKA contest a nakaidispleyan dagiti saan a gagangay ti kadakkelna a natnateng, prutas ken lames idinto nga iti benneg ti dingo, binitbit dagiti mannalon dagiti tarakenda a kalding, baka, nuang, manok ken dadduma pay para iti salip ti kinadakkelan ken kinadagsenan.

Saan a nalimitaran ti Kannawidan Ylocos Festival para laeng kadagiti taga-Ilocos Sur no di pay iti sibubukel a Rehion Uno. Babaen ti pannakitinnulong ti Departamento ti Edukasion, naangay dagiti nadumaduma a salip kas iti contemporary, cultural, ken traditional a sala, interpretative ken dance drama, choral, music ensemble, rondalla ken salip iti panagtokar iti lira ken tambor. Ditoy a nagbabalubal dagiti amin nga schools division ti sibubukel a rehion.

Agkakadakkel met a premio ti nayawat kadagiti nangabak iti kinnaaduan iti makan nga empanada, longganisa, balikutsa, tinubong, tupig, bibingka, suman, opia kalamay ken kornik.

(Adda tuloyna)