Footer

39 multicabs, naiwaras tunggal barangay ti Vigan

VIGAN CITY – Immawat tunggal barangay ditoy siudad iti multi-purpose cab bayat ti pannakaselebrar ti sentenario ti pannakaipatakder ti monumento iti katengngaan ti Plaza Burgos kas pammadayaw iti bannuar a padi.

Kinuna ni Mayor Eva Marie S. Medina a naiwaras dagiti nasao a lugan tapno adda aramaten dagiti amin a barangay ditoy siudad para iti pannakatagipen ti urnos ken talna iti siudad.

Aramaten dagiti barangay peace officers ken barangay officials dagitoy a lugan iti panangmonitorda iti urnos ken talna iti hurisdiksionda tapno malapdan ti pannakaisayangkat dagiti dakes a panggep wenno krimen.

Malaksid dayta, maaramat dagiti lugan para iti clean and green program ti barangay ken pannakaidaliasat dagiti produkto dagiti bumarangay nga ilakoda iti tiendaan, nakuna ti mayora.#