Footer

BANNER NEWS: Political violence, kinondenar papadi ti Nueva Segovia

VIGAN CITY – Maysa a pastoral statement ti inruar itay nabiit ti simbaan ditoy a nangkondenaranna iti mapapati a political violence iti probinsia.

Iti pastoral statement a pinirmaan ni Arsobispo Ernesto Salgado, kinunana a “ti sibubukel a Simbaan ti Nueva Segovia nga idadauluanmi, kondenarenna daytoy a “kinaranggas ken kinaulpit ken dagiti amin a panagabuso iti bileg wenno turay.”

Dinakamat ti pastoral statement ti “nakaam-ames a pannakapapatay” da Artemio Tugade, dati a barangay captain ti Cabaroan, Sta. Maria ken Cecilio Tolentino a taga-Magsingal, agpada a kandidato a para konsehal iti ilida.

Pinapatay ti dua a tattao a nakalugan iti amarilio a Honda XRM motorcycle ni Tugade bayat ti panagdaliasat ti motorsiklona iti Poblacion Norte, Sta. Maria, Ilocos Sur iti 11:30 ti aldaw idi Enero 6.

Pinaltogan met ti dua a tattao a nakalugan iti motorsiklo ni Tolentino iti sanguanan ti balayna iti Barangay San Vicente, Magsingal, Ilocos Sur.

Saan pay a nabigbig dagiti nangisayangkat iti pammapatay kadagiti dua a biktima.

“Ti panagpapatay, panangranggas ken pammutbuteng iti pada a tao tapno matagikua ti saad ti turay ket maikaniwas iti linteg ti Dios. Ipamatmatna ti kinaawan panangipateg iti biag a sagut ti Dios. Ipakitana ti kinaawan panagraem iti kinatan-ok ti tao ken kinaawan panagbuteng iti Dios…” kinuna ti nasao a pastoral statement.

“…Dagiti sumagmamano a di pulos makonsensia a pumatay, manggundaway wenno agaramat kadagiti killo a pamuspusan tapno laeng matagikua ken agtalinaed iti saad ti bileg ken turay. Iti kastoy a kasasaad, agbalin ti eleksion a bambanti wenno moro-moro agsipud ta daytoy a proseso, agbalin a tengngel dagiti addaan bileg a mangkontrol iti resulta babaen ti panagpapatay, pammutbuteng, panagsuitik, panangallilaw wenno panaggatang,” kinuna pay ti pastoral letter idinto nga innayonna nga “amin dagitoy, maikontra iti pagayatan ti Dios ket tubengda iti sapasap a panagdur-as ken igigin-awa iti biag.”

Kinuna pay ti pastoral statement a “nasken a tubngarentayo itan ti amin a kinakillo, panangallilaw ken pananggundaway” sana dinawat kadagiti amin a maseknan nga ahensia ti gobierno tapno tuntonenda ti naan-anay a hustisia para kada Tugade ken Tolentino ken amin a biktima ti political violence.

“Maipamatmat koma a patas ti pannakaipakat ti linteg ket awan pabpaboranna. Nasken a ti linteg birokenna dagiti nagbasol tapno ikaroda dagiti dakes nga inaramidda,” kinuna ti pastoral statement.

“Kasapulan ti nainget a pannakaipatungpal ti election gun ban tapno maliklikan ti ad-adu pay a pasamak ti kinaranggas…” inyunay-unay ti pastoral statement sana indagadag a “liklikan ti panangibutos kadagiti tao a narungsot, naranggas, ken manangallilaw…kunniber, suitik ken aggatang iti butos… naagum wenno nagamrud iti saad ken turay…#